1 Ale ari ohilipalipa mwawamini, nwakhele sana, nhivyanyihanne mupuwelo ya. 2 Akhala akina anvyuwela wira anniwerya oja vyothene vyinjiwa: nvyo akina,alovyowela wamini, anryerya matapa pahi. 3 Nna, ale anja vyothene vyinjiwa, ehathanye ale anhiya vyoja ikina. N`ale ahinja ikinaku ehiwape ale anja vyothene, okhala wira Muluku oriwajaliwa. 4 Nyuwo mw`ani nnimphuka nanteko a mwanene? Owo ariwemela ata amoraka, pw`iya ye tonvyuwela. Masi onawemela, okhala wira Muluku onniwerya omwemesa. 5 Akhala anakanyera wira mahiku makina ari mulupale oxira makinaku ya; akinaku anakanyera wira mahiku othene anolikana. Khula ntthu aitikithere mmirimani mwe. 6 Ale anttittimiha mahiku makina nkhama mulupale, annira envuwihaka Muluku. Ale anja vyothene vyinjiwa, anja envuwihaka Muluku, okhala wira anninxukhuru. Ale ahinja vyothene vyinjiwa, annihiya ikina wira envuwihe Muluku, ni vyivyo-tho anninxukhuru Muluku. 7 Mwa hiyo, khavo onkhala, aikhalelaka mwanene: khavo onkhwa, aikhwelaka mwanene. 8 Nakhalaka akumi, nikakhalela Apwiya: nakhwaka,nikakhwela Apwiya. Vyivyo, nakhalaka akumi ou nakhwa, hiyo niri atthu a Apwiya. 9 Xariya, Kristu okhwiye, ohuhumunwe, wira akhale Pwiya atthu akumi n`atthu okhwa. 10 Nna nyuwo nhinja vyothene, nniwapela-ni akhw`innyu ahinja? Othene hiyo mpakha okhumelela oholo wa Muluku, wira niphukiwe ni yowo. 11 Xariya, Vyawatikiwa vya Muluku vyinlotha wira: ``Kinnilaphela mwahawa nvyina naka wira: khula ntthu onora okikokhorela miyo; khula ntthu onolaleya owerya wa Muluku. Anlotha t`Apwiya``. 12 Vyivyo, khula mmovya a hiyo onorowa ophukiwa ni Muluku mwahawa miteko vye pahi. 13 Nna, nihittikhele-tho olamulana. Ohiya vo, mupuwele sana etthu ila: nhakakattulihe akhw`innyu ata nhatthekihe. 14 Miyo kovyuwela sana ni kotikithera nrim`aka mwahawa Yesu Kristu, wira khiyavo etthu enihela mwikho mekhaya. Nvyo, akhala ankhanyerera wira etthu ekina, etthu ila tthiri enninkhalela mwikho ntth`ule. 15 Nvyo nyuwo mwanripiha nrima nxirikhan`nyu mwahawa etthu munjannyu, khannettela ompheta nxikhannyu, Mwaha w`oja winyu, nhinrimelihe nxirikhan`nyu, yowo Kristu onkhwenleiye. 16 Nhire, wira okulupal`ennyu wa Kristu orerenle ovithiwa. 17 Exariya, omwene wa Muluku kahiyo ojha n`uwurya. Omwene wa Muluku exariya ni esalama n`uttheliwa nrima mwa Eroho Yawarya. 18 Othene ale aninnttara Kristu yiraka vyivyo anninvyiveliha Muluku, annitthitthimihiwa n`atthu. 19 Nna niramele itthu vyinniphwanyiha esalama vyinnikhaliha olipiherana wamini wihu. 20 Nhihonone miteko vya Muluku mwahawa eyojha.Exariya, eyojha vyottene ti vyorera: Masi ole onintthekiha nxirikha ye mwahawa eyojha etthu ekina enira yotakhala. 21 Valapena ohikhura enama, ata ohiwurya evinyu nuhira etthu ekina wakhala wira mwahawa etthu elo munnintthekela nxirikh`annyu. 22 Etthu munkhupal`innyu,nkhupali mmirimani mwinyu oholo wa Muluku. Oreriwa t`ule ohinthukeliwa ni nrim`aye, airaka etthu ononaiye wira ti yorera. 23 Masi ole onakanyera wira yojha ekina kahiyo yorera, ajha eyojha yelo, onnitthekela, okhala wira khaniwettela ankhil`iye awamini. Nna, vyothene niniran`yu navirikanihaka ankhili awamini ti vyatampi.