Capitulo 13

1 Khula ntthu mpakha owiwelela alupale anettiha elapo, okhala wira khawavo owerya wa wettiha elapo ohikhumme wa Muluku; ale arina owerya iwo nlaponi, athanliwe ni Muluku. 2 Nna ale ankhotta owiwelela alupale a nlaponi, annikhotta wiwelela vyoruma vya Muluku. Othene ale anira vyivyo,anawiphwanyiha otthukeliwa. 3 Xariya,ale anira vyorera khana owova atthu anruma: ale anira vyotakhala,ewove! Tivo, munnitthuna ohiwova alupale alupale? Mwire vyorera: vyivyo awo anawottottopelani. 4 Xariya,awo annivarela nteko Muluku, wira nkhale syana. Mwaira vale vyotakhala, mokhalana wova, okhala wira kahiyo etheru alupale nvahereriwawa owerya ohukhumu; awo anninvarela nteko Muluku, wira yonihere onanariwa wa Muluku, yatthukelaka ale anira vyotakhala. 5 Tivo, mpakha owiwelela atthu alupale, ohikhanle mwahawa wo wova onanariwa wa pahi, masi-tho mwahawa nrim`annyu. 6 Tivo-tho nyuwo munlivannyu Mposto, okhala wira alupale anninvarela nteko Muluku, yatharihelaka syana ntek`owo. 7 Nna mmulive khula ntthu etthu enimphwanela: mwalive mposto anene, mwalive multa ale nrinnyuna waliva: mwattittimihe atthu ottittimiheya; mwakokhorele ale nrinnyuna wakokhorela. 8 Nhaxankihe akhw`innyu: nteko nnyu okhale ophetana, mana ale anapheta akhwa anniwelela syana molumo a Muluku. 9 Xariya, vyoruma vyinlotha wira: ``Ohiraruwe. Ohimwiphe ntthu. Ohiye. Ohikhalele nrima itthu vy`anene`` ni vyoruma ikina vyothene, vyinthukumanyeya mwa molumo nimovya pahi, nenno ninlotta wira: `` Mwaphete akhw`innyu nkhama nniphetannyu``. 10 Ale anapheta akhwa khaniwirela etthu yotakhala. Tivo, ale anapheta akhwa anniwelela syana vyoruma vya Muluku. 11 Nyuwo movyuwela okathi ula ninettanhu. Wophiya okathi w`awikara ikhove, okhala wira wopowa ori vakhiviru, oxira okathi nipajenrenhu wamini. 12 Ohiyu onovira, otthimakelaka osya. Nna,nihiye miteko vya mwepiphini, nilipihiwe n`ikuru vya warya. 13 Nette ni makhalelo orera, vophwanelela miteko vy`othana. Nihiye wipeliwa ni ohapaliwa, nihiye onanttompe n`uraruwa,nihiye oruwanana n`ukhalelana nrima. 14 Nhettele makhalelo anyu otakhala: nhiramelele erutthu itthu vyininlelawa. Nvyo mwiwarihe Yesu Kristu Pwiy`anhu.