1 Axinn`aka! Mwaha wa ikharari vy`Apwiya, kinnothumereryani wira mwivaherere wa Muluku, nkhama mkuttho mkumi ni worerihiwa ni wonvyiveliha Muluku. Ola t`ori mkutthu wophwanela onvaha Muluku. 2 Nhitthare mwettelo w`atthu a vathi, masi nkurunusye mrima, ntthikele ovyuwela w`inyu, wira nwerye ovyuwela ontthunaiye Muluku, nthanlaka etthu ekhanle yorera, eninvyiveliha Muluku ni yaxariya. 3 Mwaha wa eparakha kivahiwaka ni Muluku, kinolelani nyuwo othene, ntthu ti ntthu wira: ahikhale onivyona oxira omphwanelaiye, nvyo mwivyupuwele ntharihaka miruku ni mopora wawamini, Muluku onkawenleiye khula ntthu. 4 Mwerutthuni emovya hiyo nokhala atthu awatha: khula emovya mwa itthu ivya kinvaraka nteko ya. 5 Vyivyo hiyo, niri atthu awatha, ninnikhala erutthu emovya mwa Kristu, ninnipatana ntthu n`inkhwe nkhama itthu vy`erutthu. 6 Nna khula ntthu okhalana vyovaha vyinlikana, itharaka eparakha Muluku onvanheiye. Ole ovahiwe eparakha y`olaleya masu a Muluku, alaleye attharihaka wamini. 7 Ole ovahiwe eparakha ya warumela atthu axirikha ye, arumele syana. Nkina avahiwa eparakha y`ohuvyiha, ahuvyihe n`ankhili. 8 Ole ovahiwe eparakha y`ovaha miruku vyorera, avahe ahivukulaka. Ole oniwethihera axirikh`aye, awettihere ni wakhalihera. Ole onakhalihera atthu ohawa, akhalihere n`uttekiwa nrima 9 Opheta winyu okhale w`axariya. Mthanye vyotakhala, mwire itthu vyorera ni nthiti. 10 Mphetane nkhama axinna, nrerelane nrima,nlipiherane ottittimihana nkina ni nirikh`aye. 11 Nvaraka ntekonnyu nkhomale, mwilipihere n`uluttuwa nrohoni mwinyu. Mwarumele Apwiya. 12 Ntteliwe nrima mwaha wa itthu munroromelannyu. Mwahawaka, nkavilela. Nlipihere ovekela. 13 Mwakawele ekum`innyu aKristu othoiwa. Mwivaherere owakhela syana aletto. 14 Mwalompele ale anohasyani: munvekele Muluku wira avahe itthu vyorera, ahiwirele vyotakhala. 15 Ntteliwe nrima vamovya n`ale antteliwa nrima; mwarexe vamovya n`ale anikhupanyera. 16 Mwiwanane syana. Nhiramele itthu vyawittittimihera, mwilathanihere n`ale ahinoneliwa vatthu. Nhivyupuwele okhala avyuweli. 17 Nhilive yotakhala nnireliw`annyu ni yotakhala ekina. Nhawele wira vyorera oholo w`atthu othene. 18 Waweryaneyaka, nkotthe n`ikuru vyinyu vyothene wiwanana n`atthu othene. 19 Axinn`aka, nhiwunlele ikuhu akhw`inyu: mmuhiye Muluku ahukhume. okhala wira vyihatikhiwa wira: `` Apwiya t`anlotta wira: Ohukhumu nteko aka. Ti miyo kinlevelela vyotakhala``. 20 Ihatikhiwa-tho wira: `` Mwamphwanya nwanan`innyu onvoliwa etala, munvahe yotha; avoliwa nthona,munvahe mavyi. Mwiraka vyiyvo, onrukunsya nrima``. 21 Nhihiye nweryiwaka ni vyotakhala, masi nwerye vyotakhala mwiraka vyorera.