1 Nna kinnikoha wira: Khama Muluku ohanyanyala aIsarayeli, atthu ye? Khanyanyanle khuluwi: mana miyo-tho ka mwIsarayeli, kinkhuma w`Abrahamu, nloko na Beniyamini. 2 Muluku khanyanyanle aIsarayeli, yale athanlaleiye okhuma khalai. Nyuwo munnivyuwela syana Vyawatikhiwa vya Muluku, wira Eliya ahinlela Muluku vyotakhala yairalawa atthu a Isarayeli, ahimaka wira: `` 3 Pwiya, awo yahiwipha maprofet`annyu, yahamorosya altari anyu: miyo pahi koponwe, nna awo anniramela okipha``. 4 Nna, amwakhunle vyai Muluku? Amwakhunle wira: `` Kihanle n`atthu aka ikonto thanu na pili ahinkokhorenle Bayali``. 5 Vyivyo hata nna, akhala-tho `` akinaku ahanle`` Muluku athanlaleiye n`iparakh`aye. 6 Awo arerihiwe ni Muluku mahala, kharerihiwe mwaha wa vyawira vya: wahakhanle vyivyo, eparakha ya Muluku khiyatthuna okhala mahala. 7 Nna nintthuna olotha esyeni? Atthu a Isarayeli khiyaphwannye exariya yaramelawa. Nna ale Muluku athanlaleiye yahiphwanya exariya elo. Atthu akina yahumihiwa nrima, 8 nkhama Vyawatikhiwa vya Muluku vyinlothawa wira: `` Muluku ohavaha atthu awo nrima wohijali wopowa: ohavaha maitho ahinona ni maru ahiniwa, mpakha olelo va``. 9 Davidi olotha-tho wira: ``Yotchaya yawatta yakhalele ntapha wira epharihiwe, yakhalele esya wira ekakathuliwe, ni vyivyo ehukhummwe. 10 Maitho ya eripihiwe wira ehone-tho, nthan`aya okhurupuwe wa mahiku othene``. 11 Nna kinkoha wira: aYuda yakakathunlawa, yahimora wira ehivenye-tho? Nari, khuluwi! Masi, mwaha wa w`omora wa aYuda, amalapo t`aphwannye wopowa, wira aYuda yakhalele nrima. 12 Omora wa aYuda ohareriha atthu othene, olovyowa wa ohareriha amalapo: nna wamini w`aYuda othene onotepa wareriha atthu othene. 13 Tivo, kinolelakani nyuwo, nhikhanle aYuda: okhala wira kirummwe walalerya amalapo,miyo kinnittittimiha nteko aka ola, 14 kiramelaka wawereiha nrima atthu a nloko naka, wira vyivyo akina yopowe. 15 Vaxariyani, aYuda yakhottiwawa ni Muluku, amalapo othene yahatanihiwa ni Muluku: nna othikela wa wamini, ontthuna okhala esyeni? Ontthuna olikana n`uhuhumuwa wa alipa-okhwa. Milipu vyarerihiwa, mihokhorokho vyothene ti vyorera: 16 vyivyo mitathari vya mithaikho vyarera, n`iranthi vya ti vyorera. 17 AYuda anlikana ni nthaikho worera,wathikiliwe mithaikho vya ikina. Nyuwo, nhikhanle aYuda, munlikana ni iranthi vya nthaikho wa ntakhwani vyitikeliwe ni nthaikho ole worera. Vyivyo ekenyehi ya nthaikho ole worera ennovahani ekumi nyuwo-tho. 18 Tivo, nhittottope, nthanyaka iranthi vyothikiliwa. Munwerya vyai wittottopa? Kahiyo nyuwo munlipiha mitathari, nvyo mitathari ivyo ti vyolipihani nyuwo. 19 Nyu nnokilela wira: ``Irantti ivye vyithikiliwe wira miyo kipatanihe nipuro na``. 20 Exariya. Nvyo vyothikiliwa mlatthu w`ohamini wa: nyuwo molipa mwahawa wa wamini winyu. Masi, nhivyunnuwihe: nvyo mwikhalihere, 21 mana Muluku, ohilevelenle irantti vya nthaikho ya yole, onotepa oholevelelani nyuwo, irantti vyopatanihiwa. 22 Nna, nvyuwele wira Muluku t`orera nrima ti awuma nrima: ohakhalela awuma nrima ale yahamini, nna onorerelani nrima nyuwo. Nvyo nyuwo mwahikhanyerereru orera nrima, nyuwo nnothikiliwa. 23 Nna aYuda ale yatthikela-tho wamini, anopatanihiwa-tho ni nthaikho ole worera. Tthiri Muluku onniwerya wapataniha-tho. 24 Nyuwo, amalapo, mothikiliwa va nthaikhoni vinyu wa ntakhwani, mpatanihiwa va nthaikhoni worera, wahakhanle wanyu: nna ti yokhweyasya wapataniha aYuda, ari iranthi vya nthaikho worera, epatanihiwaka va nthaikhonva. 25 Axinn`aka, nkintthuna wira nhivyuweliwe iyupuwelo vyotikiniha vya Muluku, wira nhivyone okhala atthu ovyuwela. Etthiya maru y`atthu akina a Isarayeli enorowa okhala mpakha amalapo othene ovolowa mmulokoni mw`aKristu. 26 Okathi owo atthu otthene a Isarayeli anawopowa, nkhama vyatikhinwawa wira: `` Mopoli onokhuma o Siyoni, onomaliha ohiwelela w`atthu a Yakobe. 27 Ti nno oxirikha kintthunaka opaka ni yawo, kamala okumiha itampi vya``. 28 AYuda, ekhottaka Ehapari Yorera, ahikhaliha awanani a Muluku: vyivyo nyuwo moreriwa. Masi, okhala wira ohathanla yawo, nanlelo anniphetiwa ni Muluku mwaha wa makhulupale ya a Khalai. 29 Tthiri Muluku khanakha-tho ovanheiye, ata khaniwikara athanlaleiye. 30 Khalai, nyuwo amalapo khamwamwiwelenle Muluku: nvyo nna Muluku ohomorelni ikharari mwahawa w`ohiwelela w`aYuda. 31 Vyivyo-tho aYuda ale nna khanamini, mwahawa ikharari ni Muluku. 32 Muluku ohahiya atthu othene wohimwiwelela, wira vyivyo amorele ikharari atthu othene. 33 Xariya, othajiri wa Muluku n`ankhili ye n`uvyuwela we ti wulupale. Hiyo khaninwerya otaphulela mupuwelo ye, ata ovyuwela iphiro vye: 34 nkhama vyatikhinwawa wira: ``T`ani onwerya ovyuwela mupuwelo w`Apwiya? Ou t`ani otanke wavaha miruku? 35 Ata t`ani apajenre wavaha atthu Apwiya, wira atthuveliwe n`itthu ekina?`` 36 Tthiri itthu vyothene vyipattusyiwe n`Apwiya, ti yawo ankhaliha vyeivyo: itthu vyothene ipattusyeriwe yawo. Muluku avuwihiwe mahiku othene. Amem.