¹ Miyo kiholelani ittu ivya wira muhikwathuliwe. ² Awo onowikarani mukereja mwaya, vekekhayi, onniphiya okathi onrowawa othene yole onrowa owiphani onimupuwela wira oninvaha n'thithimiyo Muluku. ³ Awo aniwira vyivyo okhala wira kanavyuwela Apapaka nari miyo. ⁴ Miyo kiholelani ittu ivya wira okathi sinrowawa okumelela, nyuwo mupuwele eseni miyo kolenlakani mwaha wa mavyu yala. Miyo n'kolenleni ittu ivya wopatheryani okhala wira miyo kari ni nyuwo. ⁵ Sothene, vano miyo kinrowa wa yole okirumme; nvyo n'lelo kavo mwa nyuwo onkikoha: wira munrowa vayi?. ⁶ Masi okhala wira miyo kiholelani ittu ivya, ojanka vosareya m'murimani mwanyu. ⁷ Sothene, miyo kinnolelani ekekhayi: tiyorera wira nyuwo wira miyo kirowe; okhala wira miyo kahirowe, mulipeleli khanrowa orya wa nyuwo, masi miyo karowa, kinomuruma wa nyuwo. ⁸ Numala mukhaliheryo orya, onimwakupaliha atthu a vathiva wa mwaha wa etampi, ni esariya ni ekekhayi. ⁹ Wa sotheka, okhala wira awo khakaminni miyo. ¹⁰ Wa esariya okhala wira miyo kinrowa wa apapa, nvyo nyuwo kamunrowa okona-tho. ¹¹ Nvyo ekekhayi, okhala wira mukhulupale a elapo yela owo olamuliwa. ¹² N'lelo kokhalano itthu sowatha wira koleleni, masi khamunrowa ovyuwela nanano. ¹³ Numala okathi owo, munepa worera, orya, owo onowethihani mwa ekekhayi yothene, okhala wira khonrowa olotha vekhaya, masi onrowa olotha sothene onrowawa wiwa, nvyo nyuwo munolaleya ittu sinrowa orya. ¹⁴ Owo onokivuwiha miyo, okhala wira onimwakela ivyi ira sawaka, nvyo onimolaleryani nyuwo. ¹⁵ Sothene ivye apapaka aryayano tisawaka; okhala wira, miyo kirale wira munepa onimwakela yele eri yawaka, nvyo nyuwo munolaleya. ¹⁶ Variyari wa okathi vakhani, nyuwo kamunrowa okona-tho; nvyo numala okathi munthene munothikela okona. ¹⁷ Numala, akinaku a awixuthawe yahilotha mukina ni mukwawe: "Eseni yela owo onnilelawe", Okathi vakhani kamunrowa okona, nvyo n'lelo, numala okathi munthene munothikela okona, okhala wira miyo kinrowa wa apapa?. ¹⁸ Ti vyivyo yalothaya: Eseni yela owo onlothawe: Okathi vakhani? hiyo kaninvyuwela ettu owo onlothawe. ¹⁹ Yesu ahona wira yathuna omukoha, nvyo ahalela wira: "Mukohane yenyuru mwaha wa ittu sothene kolenlakani. Variyari wa okathi vakhani, nyuwo kamunrowa okona; nvyo numala okathi munthene, munothikela okona?. ²⁰ Vekekhayi, vekekhayi, kinnohimeryani, nyuwo munimunla ni mwinimwikupanyerya, masi elapo enotheliwa murima; nyuwo munoripiwa murima, masi oripiwa wanyu onorukunuwa okhale otheliwa murima. ²¹ Muthiyana onnikhala oripiwa murima ewora onkhalaweno owereya wa oyara okhala wira okathi awe woyara wophiya; masi numal oyara, kanupuwela-tho wona wawe owereya, mwaha wa otheliwa murima mwaha wa omuyara mwanawe mulaponi. ²² Vyivyo, ninyuwo munoripiwa murima nanano, masi miyo konothikela owonani; nvyo murima anyu otheliwe, nvyo kavo onrowa okumiha otheliwa wanyu murima. ²³ Nihiku n'lo, nyuwo khamunrowa okikoha ettu, vekekhayi, vekekhayi, miyo kinnolelani, n'to mwaveka ettu ti ettu wa apapa mwa n'sinanaka, awo animovahani. ²⁴ M'pwakha, olelo khankivekenle ettu mwa n'sinanaka; muveke munimwakela, wira otheliwa wanyu murima omalele. ²⁵ Miyo kinnohimeryani ittu ivya kitharihaka maphanaphaniho; masi onophiya okathi kihinrowaka olotha ni niphanaphaniho, masi vowoneya kinolaleya variyari wa apapa. ²⁶ Nihiku n'lo, nyuwo munoveka mwa n'sinanaka, nvyo miyo n'kinolelani wira kinrowa wavekele apapaka mwaha wa nyuwo. ²⁷ Okhala wira anene Apapa annophentani, okhala wira muhavya okiphenta, okamini wira miyo kirule wa apapa. ²⁸ Miyo kirule wa apapa wira elapo; votharelana, miyo kinohiya elapo nvyo kirowe wa apapa. ²⁹ Awixuthawe yahilotha wira: " Mone vano munnilotha sana; nvyo kamunthara maphanaphaniho. ³⁰ Vano novyuwela wira nyuwo munnivyuwela ittu sothene, nvyo wira kavo onthuna wokohani ettu. mwaha wa vyivyo, novyuwela wira murule wa Muluku. ³¹ Yesu ahiwakhula: vano munnamini?. ³² Mone wira onnurya okathi, nvyo vekekhayi wophiya, enrowaya nyuwo omwaryamwareya khula mutthu arowe m'maithokoni mwawe, nvyo miyo mukihiye mekhaka. Masi n'kiri mekhaka, okhala wira Apapa ari mwa miyo. ³³ Miyo kiholelani ittu ivya wira mukhaleno murettele wa miyo. Mulaponi munokhalano ojanka, masi mukhaleno wilipiherya, miyo kowerya elapo.