¹ Mulopwana m'mosa aithaniwa Lazaro aiwereiwa. owo ari Obetania, elapo ya Maria ni muhimawe Marta. ² Owo ari Maria yole anthikithenle makura a mirra Pwiya Yesu nvyo kumiha inau sawe ni maihawe, numala muhimawe Lazaro aiwereiwa. ³ Asirokorawe yahivaheryerya muhupi Yesu wahima wira: "Pwiya, yole nyuwo muninphentanyu onowereiwa". ⁴ Ewora Yesu aiwalawe, ahakula: "Eretha yelo kiri wira emwiphe, masi eri wira yoniherye ovuwa wa Muluku, wira mwana a Muluku avuwihiwe variyari vaya". ⁵ Jesu aninphenta Marta, ni muhimawe ni Lazaro. ⁶ Okathi aiwalawe wira Lazaro onowereiwa ahikhala mahiku manli nipuro nenle aryawe. ⁷ Numala, ahahimerya arummwa awe: "nikarowa emara ekina Oyudeya". ⁸ Awixuthi yahimuhimerya: "Rabi, Ayuda okathi vakhani yathuna wovonyakasani ni maluku, nvyo poti vyivyo mwinthina othikela weiwo?. ⁹ Yesu ahakhula: "nihiku khanrina iwora muloko ni pili? nvyo mutthu onetha othana, kankwathuliwa, okhala wira onona warya wa othana. ¹⁰ Numala owo etha ohiyu, onnikwathuliwa, okhala wira kiwavo warya mwa yowo. ¹¹ Yesu ahilotha ithu ivya, nvyo okathi alonthawo, ahahimerya: Musirikhahu Lazaro orupa, masi miyo kinorowa wuwu kanvihe ikhove sawe. ¹² Awixuthi yahilotha: "Pwiya, yakhala wira owo onorupa, onorowa openuwa". ¹³ Yesu alotha okwa wa Lazaro, masi awo yupuwela wira Yesu alotha withuwa wa ikhove. ¹⁴ Numala, Yesu ahalelavomalela: "Lazaro ohokwa". ¹⁵ Mwaha wa nyuwo, kinnitheliwa murima mwaha wo ohikhala weiwo, wira mukamini. masi nikarowa m'pwakha wa yowo. ¹⁶ Numala, Tome, aithaniwa Didimo, ahalela awixuthi akinaku: "Nirowe vamosa wira nakwe ni Yesu". ¹⁷ Okathi Yesu waphinyawe, owo ahona wira Lazaro ari m'mahiye nvyo yahivira mahiku masese. ¹⁸ Betania yari vakiviru ni Oyerusalemu, vowatha nari vakhani ikilometru muloko ni thanu arakamelana waya. ¹⁹ Anthene Ayuda yahurya omusekurya Marta ni Maria, mwaha wa murokoraya. ²⁰ Numala Marta, okathi avyuwenlawe wira Yesu ira aryaka, ahinthimakela m'pwakha ompwanya, masi Maria ahihala owani. ²¹ Marta, numala, ahimuhimerya Yesu; 'Pwiya mwari vava, murokoraka kharowa okwa. ²² M'pwakha nenna miyo kovyuwela wira ettu ti ettu muninvekelanyu Muluku, owo onimovahani". ²³ Yesu ahimwakula yowo: "Muhimanyu onohihimuwa. ²⁴ Marta ahilotha: "Miyo kovyuwela wira owo onohihimuwa, wa ihihimuwa wa nihiku nokiserya". ²⁵ Yesu ahilotha: "Miyo ka ohihimuwa ni ka ekumi, yole onkamini miyo anamwi akwaka, onokhala mukumi. ²⁶ Nvyo yole onkhala ni onkamini miyo khanrowa okwa. munnamini ettu yelo. ²⁷ Owo ahimwakul: "ayo Pwiya, miyo kinniwaminini wira nyuwo mwa Kristu, mwana a Muluku, arowa orya mulaponi". ²⁸ Numala olotha ivyo, owo ahikumavo kumwithana Maria wiphini kumulela wira: "Mwixuthihi ori vava, nvyo onowithanani nyuwo". ²⁹ Okathi Maria oiwalawe ivyo, ahivenya nanoru nvyo ahirowa ompwanya. ³⁰ Yesu n'lelo kaphinyewariwo atthu, masi n'lelo ari nipuro nenle Maria Ampwannyawevo. ³¹ Ayuda yira emuselihaka, yonaka wira Maria ahivenyavo akuvaka nvyo yahirowa emutharelaka, okhala wira awo yupuwela wira onrowa omahiye wira amunlele murokorawe. ³² Maria numala ophiya nipuro Yesu naryawe, amonakaru, ahinkokorela munawuni alothaka: "Pwiya, mwari vava, murokoraka kharowa okwa. ³³ Okathi awonalawe yinlaka, vamosa ni Ayuda yamuhola, Yesu ahikhala oripiwa murima m'munepani. Nvyo aweriwe ni omoriwa ikharari m'murimani ahahimerya". ³⁴ Opwehiwe wowi?. Awo yahakhula: "Pwiya, murye ni mone". ³⁵ Yesu ahinla. ³⁶ Akinaku Ayuda yahilotha yaworu: "M'mone mopora oninphentawe Lazaro". ³⁷ Nananoru akinaku yahilotha: "Khanrowa mulopwana-yola owenrye onvaha wona mulipa ohona, omwirela nivawe mulopwana-ola ahikweke. ³⁸ Numala Yesu ahiripiwa murima vanthene, ahirowa m'pwakha omahiye. Nari n'thuku narino n'luku nulupale nathiyelaniwe vamukhora. ³⁹ Yesu ahilotha: "Mukumihe n'luku!". Marta, murokorawe Lazaro, yowo akwiye, ahimulele Yesu: "Pwiya, owo onninkha annivira mahiku masese akwiye". ⁴⁰ Jesu ahimwakhula: Miyo n'kohimenryeni wira mwakamini, munimona ovuwa wa Muluku. ⁴¹ Numala, yahikumiha n'luku, Yesu ahiweha ovyulu kulotha wira: "Papa, kinoxukuruni mwaha wo okiwa. ⁴² Miyo kovyuwela mahiku othene mwinnikiwa, masi mwaha wa atthu ala emenle variyari vaka miyo kolotha vyivyo, wira yamini wira timukirunme. ⁴³ Amalihaka olotha ittu ivyo, Yesu ahikuwela vanthene: "Lazaro, murye vate va!". ⁴⁴ Nankwa ahikuma ni matata ni metho sothukiwa, ni owitho okuneliwe ni ekuwo. Yesu aharuma: "M'muthukule nvyo m'muhiye arowe. ⁴⁵ Numala, Ajuda anthene yaryenle onsekurya Maria, yahona ettu Yesu apankawe, yahimwamini yowo. ⁴⁶ Masi akinaku a yawo yahirowa waphanya Afarisi, nvyo yahalela ittu sothene Yesu apankawe. ⁴⁷ Numala, alupale anamukutho ni Afarisi yahithukumana, nvyo enalotha wira"Nire eseni?" Mulopwana ola onipaka sojankiha sinthene. ⁴⁸ Nvyo namuhiya vyivya, atthu anthene anomwamini yowo, numala Aroma animorya nvyo anonakha nipuronahu ni elapo ahu. ⁴⁹ Votharelana, m'mosa a yawo aithaniwa Caifas, mwaka yole ari mulipa a mukutho, ahakula alothaka wira: "Nyuwo khamuvyuwenle ettu". ⁵⁰ Nyuwo kamunupuwela wira tiyoworerelani wira mulopwana m'mosa wakwela atthu, ohikhanle orimela atthu othene". ⁵¹ Owo khalonthe ittu sawawe, masi mwaha yokhala mulipa a mukutho wa mwakha yole, ahilaleya wira Yesu amwakwela atthu a mulapone. ⁵² Nvyo ohiya okwela elapo, masi wakwela-tho ana a Muluku, yawo amwaramwarenye, wira atukumanye wa n'loko nimovya. ⁵³ Numala nihiku nenle ni oholowaya, yahiwanana ni yahupuwela ninrowa omwipha sai Yesu. ⁵⁴ Yesu ketha vanthene variyari wa Ayuda, masi ahivenyawo arowaka variyari wa elapo yowathamela mothakoni, wa muthethe wa atthu waithaniwa Efraim, weiwo akhanlawewo ni awixuthi awe. ⁵⁵ Pascoa Ayuda anathamela nvyo atthu anthene a nipuro nenle yahirowa oyerusalemo, wira yarerihiwe. ⁵⁶ Numala , awo yanimwavya Yesu, nvyo yanilotha mukina ni mukwawe mukereja: " eseni munupuwelanyu? munona wira owo khanrya vafestani-va?". ⁵⁷ Makhulupale anamukutho ni Afarisi yahiruma wira akhala mutthu onrowa ovyuwela nipuro Yesu naryawe alothe wira awo envare.