¹ Ntthu mmovya anyu athekeliwa ni nxirikhaye a munlokoni, onwerya vyai oveka ophukeliwa n`ale ahikhanle a`Kristu? ² Khamunvyuwela wira atthu a Muluku tanrowa alamula olumwenku? Nna nweryaka olamula olumwenku, nnottelani olamula etthu ekhani? ³ Khamunvyuwela-tho wira ninorowa olamula malaikha? wakhala vyivyo itthu vya vathinva inotepa okhwa! ⁴ Mwakhumiherana nlathu mwahawa itthu vya vathi, nyuwo munrowa waphukiha atthu ahirina etthu ni Kristu! ⁵ Wuliha muru vavo! Khama onohiphwanyaneya eriyarinnyu nvyuweli, ata mmovya, okhanle ophuka milattu vy`amuvyi a nloko ninyu? <sup>6</sup> Nna, oniraney vyai nKristu onkhumihera nlattu mmuvyi ye, anlothaka oholo wa mphuki ohinamini? <sup>7</sup> Xariya, okhumiherana nlathu nyuwenaru etthu wawuliha muru khuluwi. Khama onohirerela ovilela wireliwa yotakhala? Ata wiyeriwa? <sup>8</sup> Masi t`inyuwo nniwirela yotakhala axirikhannyu, nniwiyera, nwirelaka amuvyinyu! ⁹ Khamunvyuwela wira ale aniwirela vyotakhala axirikhaya khanvolowa momweneni mwa Muluku? Nhihiye motothiwaka: ata anasusuki, ou ale anattittimiha amuluku ohikhal, ata-tho alipa-oraruwa, ata alopwana anrupihana yaworu. ¹⁰ Ou anawiye, nari-tho ananmanya, ata alipa-owapa axirikhaya, ou ananhapaliwa, nari-tho ale anhonona itthu vy`anene: khavo a yala anwerya ovolowa momweneni wa Muluku. <sup>11</sup> Akinaku a nyuwo yetta vyivyo. Nvyo nna anorapihiwa, nhatanihiwa ni Muluku, mokhalihiwa atthu a xariya mwa nvyina na Yesu Kristu Pwiy`anhu ni mwa Eroho ya Muluku anhu. ¹² Akhala anlotha wira: `` Kinniwerya wira vyothene kinthunaka``. Exariya! Nvyo kahiyo wira vyothene ti vyoloka. Kinniwerya wira vyothene kinthunaka, masi masi nkinthuna wikhaliha epottha yakhula etthu. ¹³ Xariya wira eyotta epakeliwe niphu, nna niphu nipakeliwe eyotta. Nvyo Muluku onomaliha vyopili. Erutthunhu khepakeliwe wira itthu vyonanara: epakeliwe Apwiya, tho Apwiya annisyuka eruthunhu. ¹⁴ Nna Muluku, ahuhumunsye Apwiya, ononihuhumusya-tho hiyo n`uwerya we. <sup>15</sup> Khamunvyuwela wira eruthunnyu eri mphanthe we eruthu ya Kristu? Nna miyo kokhala okusya eruthu yaka, eri ya Kristu, wira kikhalihe eruthu ya namahonona? Khoniraneya! <sup>16</sup> Khamunvyuwela wira ole onrupa ni namahonona onikhaliha eruthu emovyaru ni yowo? Tthiri vyawatikhiwa vya Muluku vyinlotha wira: `` Owaili anikhaiha eruthu emovyaru``. <sup>17</sup> Nna, ole onthukumana n`Apwiya, onikhaliha eroho emovya pahi ni yowo. ¹⁸ Nthawe ithu vyekhapa! Itampi ikina oniraiye nthu khavyinnanariha eruthu. Masi ole onira vyekhapa onnithekiha eruthu ye. ¹⁹ Khamunvyuwela wira eruthunnyu empa Yeroho Yawarya? Eroho yelo enkhala mwa nyuwo: Nruvahiwa ni Muluku. Nyuwo khahiyo mwannene mekhannyu. ²⁰ Xariya nruthunmwa ni epereso emovya. T`ivo mwettihe eruthunnyu wonvuwiha Muluku!