Capitulo 7
1
Nna, none ithu nkatikhenlenyu nkikohaka. Orerawa alopwana ohithela.
2
Masi, wira ethawe vy`ekhapa, khula nlopwana akhale ni mwariye ni wakhula nthiyana akhale ni manne.
3
Nlopwana aivaherere wa mwariye nkhama omphwanelawa, vyivyo-tho nthiyana aivaherere yamanne nkhama onpwanelawa.
4
Nthiyana kahiyo mwanene eruthu ye: mwanene ti manne. Vyivyo, nlopwana kahiyo mwanene eruthu ye: mwanene ti mwariye.
5
Nhikhothane, wahikhale wira nriwiwanana vyivyo mahiku vakhani, wira ntepe olompa, Numala, ntharene-tho ni nttittimiho, wira xetwani ahiweheryeryeni mwahawa wolipawinyu.
6
Kolenlakani, kahiyo vyoruma,masi miruku.
7
Xariya, karamela wira athu othene ekhale nkhama miyo: nvyo Muluku onvaha wakhula nthu mahala awe vyene.
8
Ale ahithenle, ata athiyana akhweliwe ni manna, kinalela wira etthu yorera okhala vyivyo ehithenle, nkhama kiralaka miyo.
9
Nvyo mwahiwerye ovilela, nthele: vala othela, ohikhanle weyela nrim`annyu!
10
Ale athenle kikaruma, nvyo kahiyo miyo, Apwiya t`anaruma wira nthiyana otheliwe ahimwalane ni manne.
11
Masi amwalana, ahitheliwe-tho ni nlopwana nkina: ohiya vyivyo, athikelane ni manne. Vyivyo-tho, nlopwana ahimwalane ni mwariye.
12
W`athu akina kinalela nruku naka, kahiyo w`Apwiya: nlopwana nKristu akhalana mwariye ohibatiziwe, ola athunaka okhala opuro mmovya, nlopwana ole ahinhiye.
13
Vyivyo-tho, nthiyana obatiziwe atheliwa ni nlopwana ohibatiziwe, nna manne ola akatthuna okhalana opuro mmovya, nthiyan`owo ahimwalane ni manne yowo.
14
Xariya, nlopwam`owo ohipatiziwe onnakheliwa ni ,Muluku mwahawa wa wamini wa mwariye owo. Vyivyo-tho, nthiyana owo ohibatiziwe onnakheliwa ni Muluku mwahawa wamini wa manne owo. Wahakhanle vyivyo, an`innyu yaya okhala nkhama ana atthu ohibatiziwa. Nvyo nna, an`innyu annakheliwa ni Muluku.