Capilulo 3
1
Nna miyo, amuvyi aka, nkawenrye wolamulelani nkhama kinalothelaka atthu ankhalela Eroho: masi kokhalana walamulela nkhama kinalamulelaka atthu ankhalela itthu vya vathi pahi, nkhama anahima owamini.
2
Kihovahani otta mahavya, ehikhanle yotta yolipa,okhala wira nanlelo khamwawerya wakhela, ata khamunwerya ou nanlelo.
3
Mana nanlelo muntthara makhalelo a vathinva. Xariya, nanlelo munnikhalelana nrima, munninyakulihana: vyivyo munnivyuweleya okhala atthu a vathinva, anethela makhalelo ontthu.
4
Akhala ntthu onlotha wira: `` Miyo kininthara Paulo``, nna nkina onlotha wira: `` Miyo kininthara Apolo``, vyivyo khamunthariha makhalelo a vathinva?
5
Nna-tho Apol`owo ntthu syeni? Paul`owo ntthu syeni? Hiyo n`ananteko pahi a Muluku, nokhalihereni wamini: novara nteko Apwiya anikawenlawa.
6
Miyo kipatinhe mithaikho, Apolo arekari mithaikho ivyo, nvyo Muluku t`oimihale.
7
Vyivyo, nlipa-opatiha kahiyo etthu, ata nlipa-orekari kahiyo etthu: mulupale ti Muluku, okhala wira t`onimiha.
8
Nlipa-opatiha ni nlipa-orekari anolikana: khula mmovya onothuveliwa yophwanela ni nteko ovanreiye.
9
Owailinhu ninvara vamovya nteko wa Muluku: nyuwo nri ematta ya Muluku. Nyuwo nri empa ya Muluku.
10
Nna, kittharaka eparakha okivanheiye Muluku, miyo kipajenre wala maluku, nkhama funti ofunti. Ohura nkina, aronha oholo. Nna, khula ntthu alipele syana mopora ontekaiye.
11
Mmalittini ohaliwamo maluku: ti Yesu Kristu. Khavo onwerya oteka malipihero makina.
12
Nna vavyulu va, akina anrowa oteka n`iwero ou ni malasi ou ni mikhutta.
13
Nihiku nolamuliwa ninrowa wonihera syana olipa wa nteko wa khula ntthu. Nihiklu nno onokhumelela nkhama moro: mor`owo onrowa wonihera olipa wa nteko wa khula ntthu.
14
Empa yalipa, ntth`ule otenke onotthuveliwa.
15
Nna, empa yeyeliwa, mwanene khantthuveliwa. Masi onawopowa, vyivyale ntthu onviraiye vamoroni ahivya.
16
Amuvyi aka! Khamunvyuwela wira mwa empa ya Muluku, ni wira Eroho ya Muluku enkhala mwa nyuwo?
17
Nna, akhala ntthu onthuna ophwesya empa ya Muluku, Muluku onompwesya yowo. Tthiri, empa ya Muluku nipuro nawarya: empa elo ti nyuwo.
18
Ahikhale onavonye. Akhala ntthu a nyuwo onivyupuwela okhala nvyuweli nkhama ovyuwela w`atthu, nanvyo ntth`ule aikhalihe nlolo va maithoni v`atthu, wira akhale nvyuweli va maithoni va Muluku.
19
Mana, ele atthu a vathi-va anonawa okhala ovyuwela, yelo Muluku t`ononaiye okhala elolo. Tthiri, Vyawatikhiwa vya Muluku vyinlotha wira: `` Muluku onnaphara avyuweli n`ulavilavi wa``
20
Vyinnilotha-tho wira: `` Apwiya annivyuwela wira wupuwela wavyuweli kahiyo etthu``.
21
Tivo, ahikhale onttirela miteko vy`atthu. Exariya wira itthu vyothene ti vyanyu:
22
Paulo ni Apolo ni Pedru n`ilapo ela ya vathi, ekumi n`ukwa, okathi ula ni ocontrolari: vyothene ivya ti vyanyu.
23
Nvyo nyuwo mw`atthu a Kristu, nna Kristu t`a Muluku.