Capitulo 2
1
Amuvyi aka! Miyo-tho, nne karonwaka okumana ni nyuwo, wira kolaleryeni exariya vya Muluku, nkohuvyinheni ni molumo awikusyerera, ata n`uvyuwela wulupale.
2
Kikhalaka eriyari nnyu, kahithuna ohiya ovyuwela wothene, wira kinvyuwele Yesu Kristu akhomeliwe va mwikimanyo.
3
Tivo, kahetta va maithoni vinyu kikhulumunwe, kovaka, kithukumelaka.
4
Itthu kahuvyihaka ni kalaleyaka, nkalaotha ni molumo ovyuwela ni okusya nrima: kalaleya n`ikuru vya Eroho Yawarya, vyeivyo vyinwera okusya nrima,
5
wira wamini winyu ohilipihiwe n`uvyuwela w`atthu: olipihiwe n`ikuru vya Muluku.
6
Nna, aKristu okhomala miyo kinnahuvyiha n`uvyuwela. Nvyo ovyuwela iwo kahiyo ovyuwela w`atthu a vathi-nva, ata w`atthu owerya anruma nlaponi, okhala wira owerya wa orowa okhwa.
7
Miyo kinlaleya ovyuwela wa Muluku, okumaneliwe ni vyotikiniha ni wipithihiwe va maithoni w`atthu. Mwaka ihipajenre okhala, Muluku onithanmlela ovyuwela iwo wira okhale ovuwa wihu.
8
Khavo ntthu owerya a nlaponi-mmu ovyuwenle. Akhala ovyuwenle, ankhomela va mwikimanyo Yesu Kristu, mwene ovuwa.
9
Nna, vyivyale vyatikhinwawa, `` khavo otanke wona ou otanke wiwa, ata wupuwela vyorera Muluku akottihenreiye ale aninpheta``
10
Muluku ononihera hiyo ittjhu ivya n`uwerya wa Eroho Yawarya. Tthiri Eroho elo ennilotha itthu vyothene, ata vyotikiniha vya Muluku.
11
Itthu vyiri mmirimani mwa ntthu, khavo onvyuwela, ohikhanle mmirimani mwe pahi. Vyivyo-tho, itthu vya Muluku khavo onvyuwela. Eroho ya Muluku pahi t`envyuwela.
12
Hiyo khinakhenle ovyuwela w`olumwenku yola, masi novahiwa ni Muluku Eroho ye, wira enivyuwelihe vyorera vya Muluku onivanheiye mahala.
13
Hiyo khaninlaleya itthu ivya vya Muluku ni molumo ahuvyihiwe n`uvyuwela w`atthu: nvyo ninlaleya ni molumo nihuvyihiwenhu n`Iroho ya Muluku. Vyivyo ninnataphulela exariya vy`aroho ale yakhenle Eroho yelo.
14
Masi ale antthara makhalelo ya pahi, khanwerya wakhela itthu vyinthuna w`Eroho ya Muluku, mana anona wira itthu ivyo ti vyololo. Awo khanwerya ovyuwela vyeivyo, okhala wira Eroho pahi t`envyuweliha.
15
Ntthu orina Eroho ya Muluku onophuka itthu vyothene: nna khavo ntthu onimphuka yowo.
16
Vyivyo vyatikhinwawa wira: `` T`ani onvyuwela onupuwelaiye Muluku? T`ani onwerya onvaha miruku? `` Nvyo nokhala ankhili a Kristu.