¹ Yeso ahihiya opuro ole khurowa nthethe wo Yudeia, okhopela wa Yordan; ni atthu yahin'wela vakina. Yena anassomiha ntoko tzalamalelalyawe. ² Afarizi yahimwathamela ni khiyanttheha ankohaka: "Etthu yorera nlopwana omwalana mwarawe?". ³ Yena ahiwakhula: "Mosi urumaleni exeni?". ⁴ Ayo yahira: "Mosi otthuniha olepa etalakha yo mwalana ni, khuyamwalana mwaraa". ⁵ Yeso, vano, ahahimerya: "Yari mwaha wolipa eroho tzinyu tivo Mosi valepalyawe ekanoeyo. ⁶ Vavo, okhuma wupatjeroni, Nluku onpakale nlopwana ninthiyana'. ⁷ Mwaha wa yeyo nlopwana onihiya papawe ni mamawe ni khutakanelaka ni mwarawe vano opilitzaya khukhalaka enama emotza. ⁸ Tzitzam'mo khankhala tho enli, massi enama emotza'. ⁹ Kukhalaka, eele etakanihalyawe Nluku, ahimwalanihe pinatamo". ¹⁰ Okathi ayo varitzaya owani, arumei yahinkohatho vanenli mwaha wa iyeyo. ¹¹ Yena ahahimerya: "Ole otene om'mwalana mwarawe ni khunthela nkina, ompaka mararuwo. ¹² Vano yena amwalana mwannawe ni kutheliya ninlopwana nkina, ompaka mararuwo". ¹³ Aniwaneliya anamwane wira avare, vano awixuthi yanakhothiha. ¹⁴ Vonalyawe Yeso eyo, ahikhala onanaria, ni khuwirela: "Mwahiye anamwane eweke wa mi n'hakothiheni, okhala wira omwene wa Nluku tiwawaya ale anlikana nala. ¹⁵ Vekhweli kinawuhimeryani: "Otene yole ohinakhelela omwene wa Nluku ntoko mwana, kankhala akelaka mwa yowo". ¹⁶ Vano Yena khwakuxaka anamwane m'matatani wawe ni kwalompela ahelelaka matatawe. ¹⁷ Vano yena vahokolelalyawe ephirwawe, nlopwana nmotza ahiwa athiawaka, ahikokhora varyawe ni khunkoha: "Funti orera, kire exeni wira khiphwanye ekumi yohimala?". ¹⁸ Ni Yeso ahimwakhula: "Exeni onkatzimaka orera? Khavo orera, ahikhalale Nluku. ¹⁹ Nyu mwinitzuwela ekano: n'hive, n'hiraruwe, n'hin'ye, n'hiwotherye akhwinyu, muhakhe, mwatthitthimihe apapen'nyu ni amamen'nyu"'. ²⁰ Nlopwana ahira: "Funti, itthuyo tzotene kinniwelela okhuma onantthompyaka". ²¹ Yeso ahin'weha ni khumphenta, ni khun'himerya: Etthu emotza enuhalela; orowe watumihe tzotene tzirinaa wakawele amassikhini, ni onarowa okhalana n'hakhu wirimo. Wamaliha, oweke ni okitthareke". ²² Vano n'lopwana ole, ohitziveliya ni molumo ale, ahikuma oripiya eroho maana kathowana mihaku. ²³ Yeso ahiweha votene khuwirela arumiyawe: Tiworikalyaya thatjiri okela mumweneni wa Nluku!". ²⁴ Arumei yari oxanka ni molumwawe. Vano, Yeso ahakulela wahimerya: "Axanaka, tiworika okela mumweneni wa Nluku! ²⁵ Tiyokweya enkamiya ovira vaphahuni va sinkano, ovikana thatjiri okela mumweneni wa Nluku". ²⁶ Ayena yari oxanka ni yaniratza m'motza ninkhwawe: "Vano tipani onthuna wopowa?". ²⁷ Yeso ahaweha ni kwira: "Watthu etthu yorika, vano kahi ni Nluku. Okhala wira etthu tzotene titzokhweya ni Nluku". ²⁸ Peturu ahipatjera on'himerya: "Hiyano nohiya etthu tzotene otthuli ni khuttharani". ²⁹ Yeso ahakhula: "vekhweli kinawuhimeryani, khavo onrowa ohiya enupa, axulupalyawe, axirokorawe, mamawe, ni papawe, anawe walani elapwawe mwaha wami ni wa molumoeala ³⁰ kuhakhelela emara emiya watthawaya, nlaponi mu, enupa, axulupalyawe, axirokorawe amamawe, anawe, elapo, atharathariyaka; ni elapo en'rwa, ekumi yohimala. ³¹ vano intjene ari opatjera anrowa okhala omalihera, ni omalihera arowa okhala opatjera". ³² Ayena anari mphironi, awelelaka oyerusalem, ni Yeso ari oholowaya. Ale Yanthara yahituthuwa ni khova. Yeso ahiwatzima nloko neli vakina, ni khwantzaka wahimerya ethu yathuna onkhumelela wohipitza: ³³ "Vano nin'welela niroaka Oyerusalem ni Mwana an'thu onrowa ovahiya ale akhulupale anankutho ni asomi. Ayo anrowa onlamula wira akhwe ni Ananvaha wa'natampi. ³⁴ Anrowa onnyohola, anxuwele yena, anthuke ni amwinve. Vano wumalani wa mahiku mararu, Yena onahihimuwa". ³⁵ Yakopo ni Yohani, axana a Zebedeu, yahiwa mpakha wayena ni khun'himerya yiraka: "Funti, nimphela n'nakhule ethu enthunehu wuvekelani". ³⁶ Yena ahahimerya: "Mwimphela kiwiriheni exeni?. ³⁷ Ayo yahimwakhula: "Nnivahe opuro wokilathi ninyu wumweneni winyu, nmotza mono ntjelo nkina mono kanyotho". ³⁸ Vano Yeso ahiwakhula: "Khamwintzuwela ethu envekelennyu. Nyu nnawerya owurerya ekahi enwureryaka mi, walani okupali epatissimo enrowaka opatitziya miyano?". ³⁹ Ayena yahimwakhua: "Hi ninawerya". Khwahimerya Yeso: "Wa ekahi enwureryaka mi nyu nnawurerya, ni mpatitzo n'thunaka opatitzia ni nyu nnapatitzia. ⁴⁰ Vano khinwa wami onvaha ntthu okilathi mono ntjelo walani mono kanyotho, vano eyo eri wayale avahereriye". ⁴¹ Vano arumei nloko viwalyaya iyo, yahitikinihiya Yakopo ni Yohani. ⁴² Yeso ahiwatzima varyawe ni khuhimya: "Nyu mwinnitzuwela wira ale ankupaliya okhala maholeli atthu annawerya, ni ale akhulupalyaya annivara enthunaya wayena. ⁴³ Vano ehikhaleke tzo variyari winyu. Ole omphela okhala mulupale wanyu, akhaleke onrumela, ⁴⁴ ni ole ophela okhala opatjera wanyu akhale epotha ya atthu otene. ⁴⁵ Okala wira mwana Anthu khawale orumeliya, yena owelale orumela ni ovaha ekumyawe owopola intjene". ⁴⁶ Ni yahiwatza Oyerico. Vakhumalyawe Yeso Oyerico ni arumeyawe ni athu intjene, nlopwana n'motza azimiya Bartimeu, mwana a Timeu, natjimola n'motza ahona, anukilati mphironi. ⁴⁷ Vinwalyawe wira ari Yeso, Onatzareth, anathamela, ahantza okhuwela iraka: "Yeso, Mwana a Davi, koneleni othunku!". ⁴⁸ Intjene yaninkotthiha yiraka omale. Vano yena anitepa okhuwela vantjene: "Mwana a Davi, coneleni othunku!". ⁴⁹ Yeso ahemela ni khuruma wira azimiye. Vano ahatzimiya khona, ireliyaka: "Ominyale! Ovenye! Yena on'niwazima". ⁵⁰ Yena ahithikha n'leya nawe, ahivenya nutupha ni khuwa wari Yeso. ⁵¹ Yeso, ahimwakhula, khwira: "Onphela khiwirihe exeni?". Khona ahin'himerya: "Mwene, kihokolele wona". ⁵² Yeso ahira: "Oroweke, wamini wao ohuvoniha". vowakuveya, yena ahakhela wonawawe ni khunthara ephiro yarowawe.