¹ Vano, Saulo, khamaala wattharatthara nuwinva amuamini aaPwiya, ahiroa m'pakha wankhulupale anankuttho , ² ni ahivekela epaphelo wira aroe enupa zamavekelo zoDamasco, wira akhala wira anamuaphuanha atthu anetthela ephiroyeyo, akuxe atthukele oJerusalem. ³ Virawe etthaka, atthamelaka oDamasco, nannanoro muenke wowaria wozulu wahinrukureria; ⁴ ni ahimorela vathi, ahinwa esoti emuirelaka: Saulo, Saulo, n'komolela exeni?''. ⁵ Saulo ahakhula: ''Nyu muapani, Pwiya?'' APwiya khuira: '' My kiYesu, we oninttharattharao; ⁶ masi ovenhe ni okele m'poma, ni onahimeriya entthunao wira''. ⁷ Atthuale yarinawe Saulo yahalale anaxankazale, yinwaka esoti, vano ahimonaka n'tthu. ⁸ Saulo ahivenha vathivale ni, vatthukulaliawe mentho, khaweria wona etthu. Vano, ahivareliya n'tata khuwaniya oDamasco. ⁹ Ahikhala mahuku mararu ahonaka, ahiliale ni ahiwuriale. ¹⁰ Ahikhala muixutthi n'moza oDamasco azimiya Ananias. Ahihimeriya naPwiya n'tthorani: ''Ananias!'' Ni yena ahira: ''Kiri va, Pwiya''! ¹¹ APwiya yahinruma: ''Ovenhe, ni oroe ephiro enazimiya Direita, ni owan'nhawe Juda wankoherere n'lopuana onazimiya Saulo, n'lopuana oTarso; maana yena onnilompa; ¹² ni, n'tthorani ahimona n'lopuana m'moza onazimiya Anania awaka ni an'helaka yena matata, wira ahokolele wona''. ¹³ Anania, ahakhula: ''Pwiya, atthu injene kinniwinwa muaha wanlopuanoyo, ehasara zinjene zinwirihawe ale anwaminini oJerusalem. ¹⁴ Yena oleveliya na akhulupale ankuttho watthuka otene anvuwiha n'zinaniNyu.'' ¹⁵ Masi, aPwiya yahimuirela: ''N'karoa, maana oyo muapuaka othanlaliaka wira akuxe N'zinanaKa wamalapo ni wamamuene,ni waaxana awisrael; ¹⁶ vano Miyano Kinaroa ontonhihera enamuna enroawe ohaawa ekisua yanzinanaka''. ¹⁷ Vano Anania ahiroa ni, vaphiyaliawe n'tthkonne, ahinhela matatawe yena, iraka: ''Munnaka Saulo, aPwiya Yesu, yukhumelelale m'phironi owaka, akiruma wira kuvonihe menthoao ni okhale ozalea N'nepa Wowaria''. ¹⁸ Nannanoro, etthu muanaa mampaluwa zahimora m'menthoniwawe, ni khuhokolela wona; ahivenha ni khuroa opatizariya; ¹⁹ ahija khunlipa m'makhuvani. Ni ahikhala na'muamini oDamasco m'pakha mahuku minjene. ²⁰ Vano aninlaleia Yesu m'pani wanthukumano, iraka wira Yena Muaana aN'luku. ²¹ Otene yinwa yakhala otikinihiya ni yanira: ''Ola n'lopuanola kahi yole ahukhumu atthu oJerusalem yalaleia n'na n'zinanna? Ni awale n'no wawaana watthukela wankhulupale ankuttho?''. ²² Wazizammo, Saulo, anilipihera, analaleia khunaapaphara mayuda yakhala oDamasco, atonhiheraka wira Yesu mopoli. ²³ Anaviralene mahuku minjene, mayuda yahinwanana wira amuinve. ²⁴ Masi akhiliayole Saulo ahizuwela. Ayena yaniwehawehaza mikhora zotene ohiyu nuuthana wira amuinve; ²⁵ masi awixutthiawe yahinkuxa nuuhiyu khun'hela n'tthankani yulupale khuntupiha ,muuri. ²⁶ Vaphiyaliawe oJerusalem, Saulo aniphela otakane naawixutthi, masi otene yanaamova, khayankupali wira niyena ari muamini. ²⁷ Masi Barnabe, ahinkuxa, khunroana warumei; khuahimeriaza yena zamonaliawe Pwiya niiphiro, ni Yena Zan'himerialiawe, ni enamuna yalalialawe nuuminhala oDamasco n'zina naYesu. ²⁸ Ari nayenaze oJerusalem, akelaka ni akhumaka, alaleiaka numinhala n'zina naPwiya Yesu ²⁹ ni anivanhihana namayuda yalavula ekeregu; masi ayo ninlelo khunaphela omuinva. ³⁰ Vano axikhuawe vazuwelaliaya eyo, yahinkuxa khunroana oCesareia ni khunroanela oTarso. ³¹ Tivoo, ikereja ejudeia yotene, egalileia ni eSamaria, zahana n'retthele ni zanitekiya, ziroaka oholo nuwova aPwiya ni nulipiheriya niN'nepa Wowaria; yanaattha atthu. ³² Vano yahikhumelela wira Pedro, onetthakazalene mitthetthe zotene, ahakhuruwelatho atthu aN'luku yakhala epoma yoLida. ³³ Ahimphuanha wenwe n'lopuana azimiya Eneia, arupathale waiyakha jexe , anusupiya. ³⁴ Pedro ahimuirela: ''Eneia, Yesu Mopoli uvonihe. Ovenhe ni watalaze oliliao''. Ni nan'nanoru ahivenha. ³⁵ Vano, otene yakhala oLida nuSarona, nunweha n'lopuanoole yahivaherera waPwiya. ³⁶ Ahikhala oJope n'rumei m'moza azimiya Tabita, en'himia wira ''Dorca''. Oyo n'thiyanoyo ari namavara miteko zorera ni miteko zoothunku zowakhalihera amasikhini. ³⁷ Yahikhumelela wira mahukuale vale anawerenya ni khukhaka. Vano nukuxiya, ahataleliya nipuro naari ozulu. ³⁸ Okhala wira oLida wari vakhiviru nuJope, awixutthi yahinwa wira Peturo ari wonwo, yahirumiya alopuana enli, avekeliyaka: ''anipuanhe n'no nan'nano''. ³⁹ Peturu ahivenha khatthara. Vaphiyaliawe, ahiveleliya ekuarutu yozulu. manankhueli otene yarizi vavale yunlazaka, anthonhiheraka ikuwo ni zoowara Dorca zapankaliawe onari nayena. ⁴⁰ Peturu ahiwirela atthu otene akhume okuarutu, ahikokhora ni khulompa. Ni atthamelaka mahithi, ahira: ''Tabita, ovenhe''. Yena ahitthukula mentho ni, nunweha Peturu, ahonkoma. ⁴¹ Peturu, ahinvara n'tata khunvenhiha, ni khuwazima makiristu ni manakhueli, khuatonhihera onari n'kumi. ⁴² Yokhumelela eyo yahizuwaneia elapo yotene yoJope, ni atthu injene yahiwakhela aPwiya. ⁴³ Peturu ahikhala oJope mahuku minjene, ninlopuana m'moza azimiya Simoni, ari namatthikittha isapato.