¹ Saulo ahakhuleliha winviyawawe. Vano okhuma nihuku nenne yahipajereya ottharatthariya ekereja yari oJerusalem; ni makiristao yaphuanhaniaza mitthetthe zovirikana oJudeia ni oSamaria, wahiya arumei. ² Atthu owamini yahinsikha Estevao ni wahavo ozikula vinjene. ³ Masi Saulo anomola ekereja vohimumula ; ni akelaka m'matthokoni, apurulelazaka atthu ota alopuana hata naathiyana, ni khuyaroana okhatthia. ⁴ Ni zizo makiristao yaroazale mapuro ovirikana, yanilaleya molumo. ⁵ Filipe ahikhuruwela epoma yoSamaria ni ahalaleraza za Mopoli. ⁶ Vano atthu vinwaliaya ni yonaka mithonhero Filipe zirawe, yaniwiriyana ele yahimiawe. ⁷ Vano, minepa zotakhala zanaakhuma atthu injene akhuwelaka vinjene; ni osupeiaza injene ni yatuthunha yahivonihiya. ⁸ Ni wahavo ohakalala muinjene epoma yele. ⁹ Masi ahikhala n'lopuana m'moza m'pomam'mue azimiya Simao, ni okhuma khalai apankazaka ekhuiri khuyathepiazaka atthu anSamaria, ni khunahimiya wira ari n'tthu ozuwanea. ¹⁰ Atthu optene anSamaria, muanamuane ni mulupale, yaninwiriyana; ayenaze yira: ''Ola n'lopuanola tule onazimiya ekururu zulupale zaN'luku. ¹¹ Ayena yaninwiriyana okhalawira okathi muinjene anaxinttha ni magitthaawe. ¹² Vano, zizam'mo, yahikupali wira Filipe alaleya molumo omuene waN'luku wanzina na Yesu Mopoli, yahipatizariya okhuma alopuana hata nathiyana. ¹³ Hata Simao ahikupali ni vapatizariyawe ahikhala ni Filipe. Vano vonaliawe mithonhero ni mirira zipankiyaka ahikhala otikiniya. ¹⁴ Nuwinwa arumei yarizi oJerusalem, wira oSamaria yahakheliya molumo aN'luku, Ahirumiya Pedro ni Yohani. ¹⁵ Ayo, vaphiyazaliaya, yahalompelaza, wira yakhele N'nepa Wowaria. ¹⁶ M'pakha okathi yole, N'nepa Wowaria wira ohinatthi onkhuruwela n'nakhala n'tthu m'moza aiyaleze; ayena yanupatizariya pahi wanzina naPuiya Yesu. ¹⁷ Vano Pedro ni Yohani yahahela matata, ni ayenaze yahakhela N'nepa Wowaria. ¹⁸ Vano Simao vonaliawe wira N'nepa Wowaria wavahiya nimatata arumei, ahavaha n'zurukhu. ¹⁹ Yena khuira: N'kivahe owerianwo, wira otene yole onroaka on'hela matataka, akheleke N'nepa Wowaria. ²⁰ Masi Pedro ahimuirela: ''Eparathaeyo ewuntthele omuanene, maana we wupuwelale opuanha etthuvo yaN'luku ninzurukhu. ²¹ We khurina m'phantthe wantekola, okhala wira erohao kahi yokhalelana waN'luku. ²² Vano,wituthjuwe etampiaeyo, ni wavekele aPwiya kisampi atthunaka wulevelela niwupuwela warohoao. ²³ Maana kinona wira onumuzala yamue owawa ni etampi zihutthuka''. ²⁴ Simoni ahakhula ni khuira: ''N'kilompele waPwiya, wira zihimialen'nhunyo ehikhale entthuna okikhumelela''. ²⁵ Pata ayena, vano, yosuahiha ni alavulaka molumo aPwiya, Pedro ni Yohani yahihokolela oJerusalem, alaliaka molumo mitthetthe zinjene zasamaria. ²⁶ Vano, n'laikha naPwiya nahin'himeria Filipe ni khuira: '' Ovenhe ni oroe m'phantthe onkela n'zuwa wa epicata enkhuruwela oJerusale oroaka oGaza''. (Epicatene yeyo tiyotakhala.) ²⁷ Yena ahivenha ni khuroa. Ni ahinweha n'lopuana awEtiopia, ohuula namasunka oCandace, piyamuene awetiope, oyo ari namuixathi amihakhuzawe zotene, awale oJerusalem olmpa. ²⁸ Ira ahokoliaka ni, ononkomale n'kuruwaxiniwawe, ahipajera onsoma nan'hupi Isaias. ²⁹ N'nepa wahimuirela Filipe: Oroe watthamele ecuruwaxile''. ³⁰ Vano, Filipe ahintthimakela ni khumpuanha ansomaka namiririmo Isaias ni khuira: ''On'nizuwela ensomao? ³¹ Muetiope ahakhula: ''Kinroa ozuwela zai ohikhalale namakilakihera?'' Yena ahinvekela Filipe wira awele n'curuwaxini onkome niyena. ³² Yolepiya yasomawe etiope yari tila: '' Yena ahikuxiya muanaa epuitthipuitthi enroa ohitiya, ni, fento epuitthipuitthi elopuanaya eri oholo wa ole ommettha, anuumala hata khatthukulale malakuawe. ³³ Ni winyevihawawe ahakhiya exariyawe; tipani ontthuna walakela n'lokonawe? Maana okumiawe wokumihiya n'laponi''. ³⁴ Vano, n'lopuana awetiope ahinkoha Fiilipe: ''Kinnuvekelani, nan'hupiola amuaza pani? Ihimia yena wala n'tthu n'kina?''. ³⁵ Filipe ahipajera olavula ni attharihelaka zolepiya, ahinlalera ehapari yorera yaYesu. ^{36 37 38} Ninlelo ayena yetthaka niphiro, yahiphiya nipuro naari mazi ni n'lopuanole ahira: ''N'konani, ahavo mazi va, vano exeni enkhotthiha opatizariya? ''Vano muetiope ahemexiha ecuruwaxi, ni khukhuruwelaza m'mazini, ni Filipe ahimpatizar. ³⁹ Vano nukhumaza m'mazini, N'nepa Wapwiya wahinkuxa Filipe, n'lopuanole khanweheletho, ni ahihokolela n'kuahawe nuttheliya n'rima. ⁴⁰ Masi Filipe ahikhumelela wAzoto ni, anilaleia ehapari epoma zotene, m'pakha ophiya oCesareia.