¹ Ahavo n'lopuana m'moza epoma yoCesareia azimiya Corneli, n'holeli anakhottho wankhulupale awitalia. ² N'lopuana owamini anrumela N'luku nitthokoawe yotene, anavaha ejimola atthu okathi wotene analompela waN'luku atthu otene. ³ Zetthaka iwora than'najexe zoothana, ahona n'tthorani n'layikha nimoza naN'luku nanwela yena. N'layikhane khumuirela: ''Corneli!'' ⁴ Corneli, ahipharula menthoawe wan'nlayikha, ahituthuwa vinjene ni khuira: Exinila, Pwiya?'' N'layikha khumuirela: ''Olompawao ni ejimolazao zinavahakao amasikhini zophiya vamenthoni waN'luku''. ⁵ Vano warume atthu epoma yoJope wira yanwane n'lopuana m'moza onazimiya Simoni, hata on'nazimiya Peturu. ⁶ Yena ori n'namatthikittha isapato onazimiya Simoni, oyo enupawe eri watthamela opharia''. ⁷ Vano n'layikha nanlavulihanne vakhumaliaya, Corneli ahiwazima anatekoawe enli ni toropa m'moza nothunku waiyale yanvarela n'teko. ⁸ Corneli khuahimeria otene inye zankhumelelale ni khuaruma oJope. ⁹ Nihuku nikina, zetthaka iwora than'namoza , zizale yena etthaka, ahatthamela opoma, Peturu ahiwela ozulu wanupa oroa olompa. ¹⁰ Vano, enanvolale etala, ahiphela oja, masi atthu atthenknzaka eyoja, wahinwela okuxiya n'tthorani. ¹¹ Ni ahiweha erimu enatthukuwale niitthu emoza yakhuruwa muanaa nifuta nankhumi notthukiya maventthmajexe, ekuruxeliyaka vathi. ¹² Ni vavo zahavo mithinto zanama zotene zamettho mixexe ni etthu zinapaza vathi ni enuni zoozulu. ¹³ Esoti emoza yahimuirela: ''Ovenhe, Peturu! Winveke ni okhureke''. ¹⁴ Vano Peturu ahira: ''N'nari, Pwiya, kokhalaru n'kinakhura etthu yokhala eharamu ni ehinrerela''. ¹⁵ Yahinwelatho, esoti wanaveli: ''Ele N'luku ererihaliawe wikhalihe eharamu.'' ¹⁶ Eyo yahiraneia evara ttharu, ni nan'nanoru etthuile yahikuxiya eroaniyaka ozulu. ¹⁷ Vano Peturu ahihala otikinihiya niitthu yahimiaya etthu yonaliawele, ahiwona atthuale orumiya ni Corneli yakoha owan'nhawe, ayo anemelazale vankhora. ¹⁸ Yahimuazima, khunkoha akhalawira Simoni, azimiya Peturu, ari wenwe. ¹⁹ Ninlelo Peturu upuwelaka yonaliawele, N'nepa wahimuirela: ''on'niwona alopuana araru anukoha wee. ²⁰ Ovenhe, okhuruwe ni watthare. Ohove oroa, Maana My kinumuruma''. ²¹ Vano Peturu ahikhuruwa ni khuwirela atthuale: Onimphelen'nhuyo timiyano. Muimphela exeni?''. ²² Vano yahira: '' N'khulupale m'moza onazimiya Corneli, n'lopuana ekhueli onintthitthimiha N'luku ni orina oxahiti worera wanloko notene naamayuda, onuhimeria n'tthorani ninlayikha naN'luku, nirika wira niwazimeni n'roe owan'nhawe ni inwe molumuen'nhu''. ²³ Vano Peturu ahiwirela akeleke niyena muenmue muariawe. Owijisu wanihuku nikina, ahivenha khuroa nayenaze, ni axin'na akinaku oJope yahinvelela. ²⁴ Nihuku nikinaku wahiphinya oCesareia. Corneli ira alipelelaka, onatthenkezale etthuzawe ni axipatthanizawe. ²⁵ Vano Peturu vaphiyaliawe, Corneli ahintthimakela ni khunkokhorela oholowawe ni khuntthotthopela. ²⁶ Vano Peturu ahinvenhiha, iraka: ''Ovenhe, maana nimiano kintthu''. ²⁷ Ninlelo Peturu alvulaka, ahikela ni khuaphuanha atthu injene anathukumanale. ²⁸ Ni khuahimeria: Nyu muinnizuwela sana wira khintthunihiya n'tthu n'yuda otakanela walani onthotola n'tthu anloko nikina. Vano N'luku okitonhihera wira kihimuazime n'tthu eharamu wala onanara. ²⁹ Tivo wazimiyaka kiwaka, vohithanla. Vano kin'nukohani, n'kazimelale exeni?'' ^{30 31 32 33} Corneli ahira: ''wamahuku majexe, wawora yela, kanalompa owan'nhaka, zetthaka iwora than'naxexe, ni khunweha n'lopuana m'moza oholowaka owara ikuwo zoowaria. Oyo ahira: ''Corneli, olmpawao ohinwiya, ni ejimolazao zamasikhini zihupuweliya oholo waN'luku. Vano onrume n'tthu oJope ni amuazime Simoni, yoyo onazimiya Peturu. Oyo ori owan'nhawe Simoni namatthikittha isapato, watthamela opharia''. Tivo warumihaliaka nan'nanoru wazimiya ni we ohira sana owa. Vano, va, niri otene othukumana oholo waN'luku wira ninwe aPwiya yurumaliaya ohimia''. ³⁴ Vano, atthukula malaku, Peturu ahira: ''Vekhueli kinnizuwela wira N'luku khanathanla atthu. ³⁵ Vano, wakuta enamuna yatthu, amOve ni avareke ekhueli ni enrerela. ³⁶ Nyu muin'nizuwela n'hupi wavahiaya atthu awisral, alaleraka ehapari yorera yanretthele muaYesu N'vuluxa, tari Pwiya atthu otene. ³⁷ Nyu mozuwala zokhumelela ziraneyale n'yudeia motene, opajra oGalileia, nuumala m'patizo waYohani ahilatthula; ³⁸ yokhumelela muaha wa Yesu oNazare, wanamuna N'luku Yanvahaliawe N'nepa Wowaria niikuru. Yena ahivara zorera avonihaka ale otene yahoxiya ni xetuani, okhala wira N'luku ari niYena. ³⁹ Hiyano naxahiti wazotene ziiraliaWe, okhuma oyudeia m'pakha oJerusalem Yesu yoyo ayena omuinvaliaya, anthomiaka vamuinkimanho. ⁴⁰ Masi N'luku on'hihimuXa nihuku naneraru ni khura izonihere, ⁴¹ kahi watthu otene, masi wamaxahiti othanliya khalayi niN'kuku: nihiyano, ninja niwuriaka vamoza niYena pata yokhua ahihimua. ⁴² Yena oniruma wira nalalere atthu ni ninkhalele oxahiti wira Yena tikhalale othanliya niN'luku namalamula akumi hata na anamakhua. ⁴³ Anamihupi otene an'nimuirela oxahiti Yena, wanamuna entthunaya wira otene yale antthuna Onkupali Yena anapuanha oleveleliya etampizaya wanzinanaWe''. ⁴⁴ Ninlelo Peturu ahimiaka inya etthunya, N'nepa Wowaria wahakhuruwela atthu otene yinwa molumoawe. ⁴⁵ Makiristu otene owula yawale niPeturu yahalale anaxankazale, okhala wira N'nepa Wowaria wahamuarela hata nale othanhiya. ⁴⁶ Maana yahiwinwa amalapoale alvulaka eluka zotikiniha ni antthotthopelaka N'luku. Vano Peturu ahakhula: ⁴⁷ ''Ohavo ntthu ontthuna wakhotthiha mazi atthuala wira ahipatizariye, ala yakhelale N'nepa Wowaria hata nihiyano?'' ⁴⁸ Ni yena ahiruma wira yapatizariye wanzina naYesu Mopoli. Vano ayenaze yahinvekela wira akhale nayena mahuku vakani/