¹ Ni vavo, nivaraka muteko wamotja ni yawo, hiyo nin'nolompelani wira muhakhele mahala vethiru. ² Okhala wira owo ohira :"Okathiworerela miyo kowiwani, ni nihiku nowopowa nihokhaliheryani''. ³ Hiyano khan'niiyathi nluku ninkwakwathula eriyari ya ntthu, okhala wira khanintthuna wira olaleya wihu okhale wa mahala. ⁴ Ohiya vo, nin'nilawiherya mwa miteko tjihu wira nananteko a Muluku: ovilela wintji warinaya muhawani, movelavelani motthukeliyani, ⁵ mohaxiyani, m'makhatteyani, mokhulumuwani, m'mitekoni tjolipa, ohiyu wohirupa, mwetalani; ⁶ mwaha wowarya, mwaha wotjuwela, mwaha wovilela, mwaha worera murima, mwaha wa n'nepa wawela, ni mwaha wa nifento nohotha, ⁷ mwaha wa mulumo ekekhayi ni mwaha wa ikuru tja Muluku; mwaha wa ikapwitthi tj'ekekhayi mwa ntata nolopwana ni nothiyana, ⁸ mottittimihiyani ni mohittittimihiyani, movehiyani ni movuwihiyani; nihimiyaka ntoko anawothe, vano n'atthu ekekhayi; ⁹ ntoko atthu ohitjuweliya, vano n'atthu otjuweliya orattene; ntoko nikhwaka, ni ntoko nikhalaka! ntoko ohaxiya ni tjowira tjihu, vano khahiyo otthukeliya wokhwani; ¹⁰ ntok oripiya murima, vano nlelo nivilelaka; ntoko atthu ohawa, vano nikhalanaka ventji; ntoko nihikhalanaka etthu, vano nikhalanaka ventji ¹¹ Nin'nohimerya nyuwo ekekhayi yotene, Akorintu, ni murimiihu ori wotthukuwa. ¹² Mirima tjinyu khiiwaliye ni hiyano, vano tjiwaliye ni mupuwelwinyu. ¹³ Vano va, nottikhiya wekekhayi, kinlavula ntko anamwane: ntthukule mirima tjinyu tjotene ¹⁴ N'hikhalane mupwelo wovirikana ntoko atthu ohamini, vaholo wiwanana xeni orinaya ekekhayi ni wotha? Ni watana xeni orinaya warya ni epiphi? ¹⁵ Watana xeni okhanlyaya okhalana kristu ni Beliyeli? Ni exeni orinawe vamotja ntthu owamini ni ohamini? ¹⁶ Ni watana xeni orinaya empa ya Muluku ni iyowa tya akhulukana? Okhala wira hiyano na empa ya Muluku nkumi, ntoko Muluku tyihimalyawe: "Miyano kinakhala mwa yayo ni kinimwetta mwa yayo. Miyano kinakhala Muluku aya, ni awo anarowa okhala atthu aka ¹⁷ Vano, nkhume variyari waya, ninkhale owivalanyiha, anihimya t'Apwiya. Ni n'hikwan'nye etthu yohiloka, ni miyano kinawakhelani. ¹⁸ Miyano kinakhala tithiinyu, ni nyuwano n'narowa okhala anaaka", anihimya T'apwiya owerya tjotene.