¹ Kintu andju toka si korneta garandi, n’odja un strela kai di seu pa tera, i dadu tchabi di kobon di abismu.

² Otcha kobon di abismu yabri, i subi um fumasa, ku parsi ku fumu di furnu garandi es fumasa i bidanta sol, ku ar sukuru. ³ Na fumasa i bin tan ganfanhoti na tera e dadu puder suma puder dilakaran na tera.

⁴ E faladu pa ka e fasi mal pa nin padja verdi ku ta kemadu, nin pa arvoris, ma son pa djintis ku ka tene marka di Deus. ⁵ E pirmitidu pa ka e matal elis ma pa e turmenta elis pa sinku mis, kil turmenta i suma pikada di lakaran.

⁶ Na ki dias omis na buska mortu, ma e kana otchal, e na misti muri, ma mortu na lundjusi elis. ⁷ Parsensa di kil ganfanhoti, i suma kabalu ku kipadu pa geria, na se kabesa e tene un kusa suma koroa di uru, se rostu parsi ku omis

⁸ E tene kabelu suma di mindjer, se dintis i suma di lion.

⁹ Na se pitu e tene armadura di feru ku ta tchomadu kurasa. Barudju di se asas i parsi ku barudju dimanga di kabalus ku na bai pa gera. ¹⁰ Se rabu parsi rabu di lakaran , gudja di rabu tene puder pa dana djintis pa sinku mis.

¹¹ E tene ba se rei, ku sdu andju di abismu, ku si nomi na ebraiku ta tchomadu ABADON, na gregu ta tchomadu APOLION.

¹² Un ai pasa dja i falta dus ai. ¹³ Sestu andju toka si korneta garandi n’obi vos ku bin di kuatru pontas di altar di uru ku sta dianti di Deus.

¹⁴ Ku fala ki andju ku tene korneta garandi, larga ki kuatru andjus ku prindidu pertu di riu Eufratis.

¹⁵ Ki kuatro andjus staba purparadu pa kil ora, pa ki dia, pa kil, mis pa kil anu, pa mata tersa parti di omis. ¹⁶ Numeru di tropas ku monta na kabalu n’obi se numeru.

¹⁷ Na nha vison kilis ku na kurunti kabalu e teneba tadjadera di pitu bermedju suma fugu, azul suma safira, amarelu suma n’sofri, kabesa di kabalus i era ba suma di lion, i na se boka i na sai fumu di n’sofri. ¹⁸ Pabia des tris praga, tersa parti di omis muri, pa fugu, pa fumu, ku n’sofri, ku na sai ba na se boka.

¹⁹ Pabia puder di kabalus sta na se boka, ku se rabu, rabu parsi serpenti ku tene kabesa ke ta kastiga ku el ²⁰ Omis ku ka muri di kil kastigu, e ka ripindi, di kusas ke fasi, pa dida adora dimonius, ku idulus di uru, ku prata, ku kobri, ku pedra , ku po, ku ka pudi nin odja, nin pa obi, nin pa yanda,

²¹ Nin e ka ripindi di manera ke mata djintis, nin di se futis, ku se pekadu seksual, nin di se furtu.