¹ Dipus des kusas n’obi garandi vos di un multidon, ku na fala: Aleluia, salvason, ku gloria, ku onra, ku puder, i di Sinhor no Deus.

² Pabia bu djustisa i djustu, i di bardadi, bu djulga ki garandi mindjer di mau vida ku kurumpi tera ku si mau vida, na si mon bu vinga sangi di bu sarvus. ³ E fala utru bias Aleluia, si fumu sibi pa tudu sempri.

⁴ Ki vinti i kuatru garandis, ku ki kuatru limarias garandis e m’borka e adora Deus ku sra sintadu na tronu e fala: amen, Aleluia. ⁵ N’obi vos garandi ku sai na multidon ku fala: Bo n’gaba Deus abos tudu si servus, abos ku rispita si nomi, garandis ku mininus. ⁶ N’obi vos di multidon, suma barudju di yagu, ku barudju di turbada ku na fala: Aleluia, pabia Sinhor ku tene tudu puder i na rena. ⁷ No kontenti ku algria, no dal gloria pabia kasamenti di karnel tchiga dja, si noiba sta dja pruntu.

⁸ E bistil di linhu finu ku ta lampra, pabia linhu finu signifika djustisa di santus. ⁹ I falan: skirbi sortiadu i kilis ku tchomadu pa sia na festa di kasamenti di karnel, i falan es palavra i di Deus i di bardadi.

¹⁰ M’borka na si pe pan adoral, ma i falan ka bu fasi kila, ami tambi i servu di Deus suma bo, ku bu ermons, ku tene tustumunhu di Jesus; adora Deus, pabia tustumunhu di Jesus el ki spiritu di anunsiu. ¹¹ N’odja seu yabri, i sta ba la un kBlu branku kin ku montal si nomi i fielr verdadiru, ku ta djulga i geria ku djustisa.

¹² Si udjus na lampra suma fugu, na si kabesa i i tene manga di koroa, un nomi ku skirbidu ku ningin ka kunsi, so kil ku skirbil.

¹³ I bisti un kamisa ku mantchadu ku sangi, kil nomi ki ta tchomadu i palavra di Deus. ¹⁴ Tropas di seu bin si tras e bisti linhu finu, branku puru.

¹⁵ Na si boka i na sai spada gudu, pa fidi nasons ku el. I na manda ku vara di feru, el propi ku na masa lagar di binhu di raiba di Deus ku ten tudu puder.

¹⁶ Na si kamisa na parti di perna i sta skritu Rei di reis, i Sinhor di Sinhoris ¹⁷ N’odja un andju ku sta ba na sol, i girta risu i fala: tudu pastrus ku na bua na metadi di seu bo bin djunta pa sia di no garandi Deis.

¹⁸ Pa bo kume karni di reis, karni di Juis, karni di di djintis fortis, karni di kabalus ku djintis ku monta elis, ku karni di tudu omis livris, servus, pikininus, ku garandis. ¹⁹ N’odja besta, ku reis di tera, ku se tropas e djunta pa geria kontra kil ku sinta na kabalu ku si tropas.

²⁰ Besta, prindidu el ku falsu anunsiadur ku si dianti i fasi milagri, ki n’gana kilis kurisibi sinal di besta, e adora si imajen, elis dus e fertchadu bibu na lagua di fugu ku na yardi ku n’sofri. ²¹ Kil utrus e matadu ku spada ku na sai na boka di kil ku sinta na kabalu, pastrus farta ku si karni