¹ N’ odja un sinal garandi na seu, ku sedu un mindjer ku bisti di sol, ku lua na ladu di pe,i tene koroa ku dozi strelas na si kabesa. ² I prenha i na grita ku dur di partu i na sufri ku turmenta di padi. ³ N’odja tambi na seu un sinal di animal limaria burmedju ku parsi lagartu, ku ta tchomadu dragon i tene seti kabesa, ku des tchifris, na si kabesa i tene seti koroa. ⁴ Si rabu i rasta tersa parti di strelas di seu i lansa elis pa tera; ki dragon sikidu dianti di mindjer pa pudi mata fidju ku na padidu. ⁵ I padi un fidju matchu ku na bin manda na nasons ku setru di feru (nota explicativa) ku garandi otoridadi. Si fidju rabatadu i lebadu pa Deus na si tronu.

⁶ Ma mindjer fusi pa disertu, nunde ku Deus purpara lugar pa i sustentadu pa mili duzentus i sasenta dias. ⁷ Gerra kudi na seu, Migel ku si andjus, geria kontra dragon ku si andjus. ⁸ E derotadu e pirdi se lugar na seu. ⁹ Dragon garandi riantadu, ku sedu antigu serpenti ku satanas ku diabu, ku ta n’gana tudu mundu, i riantadu pa tera el ku si andjus. ¹⁰ N’obi garandi vos na seu ku proklama: gosi salvason, ku puder, ku reinu di no Deus tchiga otoridadi sta na mon di si Kristu, akusadur di no ermons serkadu, el ku ta akusa elis di dia ku dinoti dianti di no Deus. ¹¹ E vensi pabia di sangi di karnel, pabia di palavra di se tustumunhu ke da mesmu dianti di morti, e ka ama se vida. ¹² Seu, ku kilis ku mora la bo kontenti,ai di tera, ku mar pabia diabu ria ku garandi raiba pa bos, pabia i sibi kuma i sobral puku tempu. ¹³ Otcha dragon odja kuma i riantadu pa tera i pirsigi mindjer ku padi kil fidju matchu.

¹⁴ Ma mindjer dadu dus asa di un agia garandi pa i bua pa disertu nunde ki sustentadu pa duranti tris anus i meiu, lundju di udjus di serpenti. ¹⁵ Serpenti tira yagu na si bok suma riu ku rasta tras di mindjer pa fogantal. ¹⁶ Ma tchon sakura mindjer i yabri si boka i n’guli kil riu ki derpenti tira na si boka. ¹⁷ Dragon panha raiba di mindjer i bai geriakontra restu di si djorson, kilis ku ta guarda mandamentus di Deus, ku tene tustumunhu di Jesus. ¹⁸ Dipus ki dragon firma na reia na roda di mar.