¹ E dan un kana ku parsi regua, e falan lanta bu midi templu di Deus ku altar di Deus, ku kilis ku ta adora la.

² Ma ka bu midi parti di baranda ka bu midil, pabia djintis di utru rasa dadu el pa e masa sidadi santa pa korenta i sinku mis. ³ Na da nha dus tustumunhu puder pa e anunsia pa mil i duzentus i sasenta dias, e na bisti panu di saku.

⁴ Es i ki dus pe di olivera, ku dus kanderu ku sta dianti di sinhor di tera.

⁵ Si algin misti fasi elis mal, fugu na sai na se boka i na kaba ku se indimigu, si algin na buska elis pa fasi mal e na muri des manera. ⁶ Esis e tene puder pa fitcha seu pa ka tchuba tchubi, na dias ke na anunsia e tene puder sobri yagu pa i bida sangi, pa tisi tudu koldadi di praga kantu bias ke misti.

⁷ Otcha e kaba tustumunha, besta subi di kobon garandi i na nganha, i na mata elis. ⁸ Se kadaver i prindadu na prasa garandi, sidadi ku ta tchoma sodoma, ku egiptu, nunde tan ku se Sinhoe krusifikadu.

⁹ Omis di varius povus, rasas, lingus, ku nasons e na odja se kadaver pa tris dias i meiu e kana pirmiti pa se kadaver pudu na koba. ¹⁰ Kilis ku mora na tera e kontenti dimas, e manda prisentis pa kumpanher pabia e dus anunsiaduris e turmenta kilis ku mora na tera.

¹¹ Dipus di kil tris dias i meiu, spiritu ku bin di deus yentra nilis e lanta e firma, djintis ku odja elis e panta risu.

¹² Ki dus anunsiaduris e obi vos ku bin di seu ku fala bo sibi li, e sibi na un nuven, si indimigu odja elis. ¹³ Na kil mesmu ora i kontisi garandi tirmidura di tchon, desima parti di sidadi kai nes tirmidura di tchon i matadu seti mil omis, kilis ku sobra e panta risu.

¹⁴ I pasa dja sugundo ai, terseru ai na bin i kana tarda ¹⁵ Otcha setimu andju toka si korneta garndi, vos garandi sai di seu ku fala: reinu di mundu dja i sedu di no Sinhor, ku si Kristu el i na reina pa sempri. ¹⁶ Vinti i kuatru garandis ku sinta na se tronu dianti di Deus e mborka e adora Deus.

¹⁷ E fala no na dau grasas, Sinhor ku tene tudu puder, kil ku sedu ba, ku sedu bu asumi bu garandi puder i bu na reina. ¹⁸ Nasons panha ba raiba, ma i tchiga dia di bu raiba tempu pa julga mortus, i pa rekompensa bu servus, profetas, ku santus, kilis ku rispira bu nomi garandis ku pikininus. I tchiga tempu di bu kaba ku kilis ku ta dana tera. ¹⁹ Otcha templu di seu yabri i odjadu arka di alinsa i kumsa fasi barudju di turbada, tchon tirmi, garandi tchiba di jelu kai