¹ Miyo kinihimya ekekweli wa Kristu; miyo nkinootha. Mupuwelo aka on'ninvaha namona wa miyo, wa N'nepa Wawela, ² wira koripiya murima ventji ni etthu enikiwereya wa murimani waka; ³ waholo miyo kaniphavela wira katakhaalihiye ni kivalanihiya ni Kristu mwaha wa nifento na axina'naka, ari apatthani aka a n'namani. ⁴ Ayo anaisarayeli. On'niiwi mphantti ovaliya, ovuwa, watana, ovahereriya wa Mikettelo, wonttottopela Muluku, ni anatiri. ⁵ Ayo atthu ale avirale, yayo ari maloko akhumale Kristu, n'namani, yoyo ori Muluku a atthu otene, attottopeliye oyo wohimala. Amem. ⁶ Numala khahiyo molumo a Muluku anuhikhala tjana. Waholo khahiyo otene ari wisarayeli ta wisarayeli. ⁷ Tjitjam'mo tho khahiyo otene ari maloko a Abrahamu anaawe wekhweli. Numala,'' mwaha wa Isaki, animwiihaniya maloko awe''. ⁸ Eyo piyo, anamwane a n'nami khahiyo anamwane a Muluku. Numala anamwane a natiri aniwehiya ntoko maloko. ⁹ Waholo ala molumo a natiri: ''Okathi uyo Miyo kinawa, ni onavahiya mwana m'motja Sara''. ¹⁰ Ni khahiyo eyo pahi, nave tho numala Rebeka onrupala tithihu Isaki ¹¹ Ni anamwane nlelo yiira ahinatthi oyariya, yiira ahinatthi opaka etthu yorera wala yotakhala ( wira yoophavelawe Muluku ettharihelaka ele yothanlawe ekhale, khahiyo mwaha wa miteko, numala mwaha wa Ole onihana), ¹² eyo ahihimeriya oyo: ''Opatjeriya onanrumela okhitjeriya.'' Tjitjam'mo yolepiya: ¹³ ''Miyo konfenta Yakobi, numala konthanya Esawu''. ¹⁴ Exeni enikelihu ohimya, vano? Wookhala wootha wa Muluku? Khonikhalakhala! ¹⁵ Waholo Oyo on'himerya Moise: ''Miyo kinamwaakhupanyrya ale anitthunaka waakhupanyerya, ni kinamwamorela ikharari ale anitthunaka wamorela ikharari''. ¹⁶ Vano, eyo khenittharihela wa khula onitthuna, n'nakhala wa ntthu onitthimaka, numala wa Muluku, orina mahala. ¹⁷ Waholo tjoolepiya tjinin'himerya Farawu: ''Mwaha wa yeyo kihuvenyihani, wira wa nyuwo koniherye owerya Waka, ni wira Ntjina Naka nittottopeliye elapo yotene''. ¹⁸ Vano, Oyo on'nim'morela ikharari Ole onimphavelawe, ni on'ninlipiha ole onintthunawe. ¹⁹ Vano, nyuwo n'nakihimerya: ''Mwaha wa xeni Oyo nlelo oninkhupanyawe ntthu? Waholo tipani akhoottale yotthuna Awe?'' ²⁰ Wohikhala vo, ntthu, tipani nyuwo n'nimwakhula Muluku? Exeni enikela ohimerya oloko wa ole uupale: ''Mwaha wa xeni nyuwo nkipakalinyu tjitjam'mo?'' ²¹ Kharina owerya mwanene oloko wuupa nrinki wira ovareliyeke miteko tjulupale, ni nkina miteko tja atthu otene? ²² Ni wakhala Muluku, aphelaka woniherya opwapwa Wawe ni otjuweliha owerya Wawe, oovilela ventji ni mirinki tjoopwapwa, tjireheriye onyanyiya? ²³ ni warookhala Oyo otjuweliha othaatjiri wa warya Wawe wa mirinki tja mahala, wa warya Oyo areheralyawe wahinatthi, ²⁴ yayo ari hiyo, yayo awihanalyawe, khahiyo wa ayuuda pahi, numala tho wa amalapo? ²⁵ Tjitjam'mo tho Oyo on'himeralyawe Oseiya: ''Miyo kowihana atthu aka ale yahakhalale atthu Aka, ni ofentiya, ale yahakhalale ofentiya. ²⁶ Ni okhalaka, nipuro nahimeriyaya ayo: 'Nyuwo khahiyo atthu aka', inwo ayo anamwihaniya: 'Anamwane a Muluku Nkumi'''. ²⁷ Yesaya ahivekela mwaha wa Isarayeli: ''Hata numuru na anamwane a Wisarayeli yaari ntoko itthaya tja mphareya, anakhala akina anikela woopowa, ²⁸ waholo Apwiya anawana molumo aya elapo yotene, wowakuveya ni wootene.'' ²⁹ Ni, ntoko Yesaya ehimalyawe: ''Warokhala Apwiya a Nkhottone khanihiyeryale maloko, nankhala ntoko Sodoma ni Gomora''. ³⁰ Exeni enikelihu ohimya, vano? Wira amalapo, yaharowela ekhweli, apwanya ekhweli, ekhweli mwaha wa nroromelo; ³¹ numala Isarayeli, arowelale mikettelo tja ekhweli, khaphwanyale. ³² Mwaha wa xeni? Mwaha wowira ayo kharowelale eyo ni nroromelo, numala ni miteko. Ayo akwakwatthuwa wanlukuni wa okwakwatthuwa, ³³ ntoko tjilepiyaya: ' ''Miyo kin'nihela Osiyoni nluku nookwakwatthuwa, nluku noonyakuliha. Ole onitthuna wamini khonulihihiya Muru''.