¹ Vano, khokhalale tho otthukhweliya wa ale ani'ntthara Yesu Kristu. ² Okhala wira mikettelo tja N'nepa wa okumi wa Yesu Kristu tjookitaphula m'miketteloni mwa etampi ni okhwa. ³ Waholo yele mikettelo tjahaweryaya opaka, okhala wira tjari tjoottettheya mwaha wa erutthu, Muluku on'nipaka. Oyo on'ruma mwana awe oolikana ni erutthu yoottheka, aphelaka wira aakhale ntoko yovaha ya etampi, ni Oyo otthukwa etampi mweerutthuni. ⁴ Oyo opakale eyo wira yootthunaya mikettelo yiiraneye wa hiyo n'nikhala, khahiyo ottharihela erutthu, numala ottharaka N'nepa. ⁵ Ale anikhala attharihgelaka erutthu an'nikhalana ephole ni tjitthu tja mweerutthuni, numala ale anikhala attharihelaka tjitthu tja m'munepani, anitthara tjitthu tja m'munepani. ⁶ Waholo wupuwela wa n'namani okhwa, numala wupuwela na N'nepa ekumi ni nrettele; ⁷ okhala wira tjitthu tja n'namani khatjinintjivela Muluku, waholo khahiyo mikettelo tja Muluku, n'nakhala khatjiniwerya okhala. ⁸ Ale ari n'namani khaniwerya ontjiveliha Muluku. ⁹ Wa tjotene, khankhalale n'namani, numala Mun'nepani, wakhala wira N'nepa wa Muluku onikhala wa nyuwo. Numala wakhala ntthu kharina N'nepa wa Kristu, khahiyo awawe. ¹⁰ Wakhala Kristu ori wa nyuwo, erutthu ehokhwa n'hina wa etampi, numala N'nepa wookhala n'hina wa ekhweli. ¹¹ Wakhala wira N'nepa wa Ole on'humusale Yesu mwaalipa okhwa onikhala wa nyuwo, Oyo on'humusale Kristu mwaalipa okhwa onawa tho wovahani okumi mwerutthuni mwinyu mookhwa mwaha wa N'nepa Awe, onikhala wa nyuwo. ¹² Vano, axin'na aka, khan'nikhala n'namani, wira nikhaleke nittharihelaka enama. ¹³ Waholo, mwaakhalaka nttharihelaka enama, n'naakhwa; numala, n'hina wa N'nepa mwinvavave tjitthu tja mweerutthuni, n'naakhala. ¹⁴ Waholo ale aneettihiya ni N'nepa wa Muluku, ayo anamwane a Muluku. ¹⁵ Okhala wira khimwaakhelale tho n'nepa wa ipottha wira mooveke, numala mwakhelale n'nepa wa ovaliya, mwa yoyo n'nihanihu: ''Abba, Tithi!'' ¹⁶ N'nepa mwanene on'nivaha namona mun'nepani mwihu wira nanamwane a Muluku. ¹⁷ Wakhala wira nanamwane, ni tho nanamahalana, anamahalana a Muluku, ni anamahalana a Kristu, wakhala wekhweli ninihawa ni yoyo wira nivuwihiye wamotja ni Yoyo. ¹⁸ Okhala wira kin'nona wira ohawa wa okathi ula wananano khonilikana ni ovuwa onikelihu woniheriya. ¹⁹ Waholo ophela wa opattuxa onilipelela wintjoniherya wa anamwane a Muluku. ²⁰ Okhala wira opattuxa ori n'hina wa tjitthu tjoohiloka, khahiyo mwaha woophela waya, numala ophela wa ole ohelale, ni olipelela ²¹ wira yoopattuxiya yintaphule mwenene mwepotthani mwa ohawa wira etaphuwe mwa warya wa anamwane a Muluku. ²² Waholo notjuwela wira ele epattuxiya enoova ni en'nona owereya ntoko nntthu oniphela oyara olelo. ²³ Khahiyo eyo pahi, mumala tho hiyo, nirina mihokorokho tjopatjerya tja Mun'nepani - hiyo nin'nona n'hina, nilipelelaka ovaliya, ophukiya wa erutthu ihu. ²⁴ Waholo moolipelelani nihopowa, Numala enilipelelihu wira yiiraneye, nlelo khenatthi wonaneya, waholo enilipeleliya tjayi etthu enooneya? ²⁵ Numala nalipelelaka ehinoonihu, ni ovilela nin'nilipelela. ²⁶ Tjitjam'mo tho, N'nepa tho on'ninikhaviherya moottettheyani mwihu. Waholo khan'nitjuwela nthinto woovekela, numala N'nepa mwanene on'ninivekelela hiyo ni wiikhupanyerya ventji. ²⁷ Oyo, oniwehaweha mirima, otjuwela mupuwelo wa N'nepa, okhala wira Oyo on'navekelela atthu owarya, ottharihaka otthuna wa Muluku. ²⁸ Notjuwela wira tjitthu tjotene tjinittharihela mwa tjoorera wa ale animova Muluku, ale aniganiya mwaha wa etthu awe oniphavelawe. ²⁹ Okhala wira, ale antjuwelale, Oyo tho ophweha wira akhale ntoko elatarato ya Mwana Awe, wira Oyo okhale oopatjerya eriyari wa axin'na entji. ³⁰ Yayo anthanlalyawe, ni tho ayo owihana. Wale owihanalyawe, ayo tho, Oyo owaakiha. Wa ale owakihalyawe, ayo tho ohavuwiha. ³¹ Exeni nto nikhanlihu ohimya wa tjitthu in'ya? Wakhala wira Muluku ori ni hiyo, tipani onikela oniwanana? ³² Oyo, anlevale mwana Awe, numala onvahererya mwaha wa hiyo otene, ohinikela onivaha tjayi tjitthu tjotene? ³³ Tipani onikela owanawana ni ale othanliya ni Muluku? Muluku toniwakiha. ³⁴ Tipani onaatthukela? Kristu tonikhwelale hiyo, ni, wovikana eyo, ni tho ohihimuwa. Oyo ori mono wolopwana wa Muluku, yoyo tho oninivekelela hiyo. ³⁵ Exeni enikela onivalaniha ni nifento na Kristu? Ohawa, oxanka, olupatthiya, etala, othaaleliya, woova wala ekatana? ³⁶ Ntoko elepiyaya: '' Mwaha wa nyuwo, nin'nikhwa wakhula nihuku. Nikhalihiye ntoko epwittipwitthi wookhwani''. ³⁷ Wa tjitthu in'ya tjotene, niri ntoko atthu owavikana anamaxintta wa Ole onifentale. ³⁸ Waholo kootjuwela wira n'nakhala okhwa, n'nakhala ekumi, n'nakhala malaikha, n'nakhala mamwene, n'nakhala tjitthu tjinoneneya, n'nakhala tjitthu tjinikela owa, n'nakhaka owerya, ³⁹ n'nakhala otjulu, n'nakhala wowixa, n'nakhala etthu epattuxiye kheniwerya onivalaniha ofenta wa Muluku, ori wa Kristu Yesu Apwiya ihu.