¹ Axin'na aka, yophavela ya murima aka ni yonlipelaka Muluku wa ayo ti wi yoopowe. ² Waholo kin'nivaha namona wira ayo an'nintthara Muluku, numala khahiyo ni otjuwela. ³ Waholo, ahitjuwelaka ekhweeli ya Muluku, aphelaka owana otjuwela waya, wohitakanihana ni ekhweeli ya Muluku. ⁴ Waholo Kristu wiiraneya tja Ikettelo wa ekhweeli ya ale otene anaamini. ⁵ Okhala wira Moise on'nilepa mwaha wa ekhweeli eniwa: ''Ntthu onipaka tjitthu tja ekhweeli tjiniwa m'miketteloni onaakhala mwaha wa ekhweeli''. ⁶ Numala ekhweeli eniwa n'hina wa nroromelo enihimya: ''N'hihimye n'hina wa murima inyu: 'Tipani onikela owela wirimu?' (eyo piyo, wira onwane Kristu vathi); ⁷ wala: 'Tipani onikela okhuruwela wephini?' (eyo piyo, wira akumihiye Kristu waalipa okhwa)''. ⁸ Numala exeni enihimya? ''Molumo ari wakhiviru wa nyuwo, wa yanoni winyu ni wa murimani winyu''. Ala molumo a nroromelo hiyo ninlaleyihu. ⁹ Waholo, wohikhala ni iyano tjinyu ohimya Yesu ntoko Apwiya, ni n'naamini ni murima inyu wira Muluku on'humusa waalipa okhwa, n'namopowa. ¹⁰ Okhala wira ni murima on'naminiya ekhweeli, ni iyano on'nihimiya molumo owoopola. ¹¹ Waholo Tjolepiya tjoohimya: ''Otene ale animwaamini khanulihihiya muru''. ¹² Waholo khokhalale ovalanihiya wa ayuuda ni akereko; okhala wira Apwiya yayo t'Apwiya a atthu otene, aryeene thaatjiri a atthu otene animwihana. ¹³ Okhala wira otene anihana ntjina na Apwiya anamopowa. ¹⁴ Oniweryaneya tjayi wihaniya Ole ohaminihiye? Ni oniweryaneya tjayi waminiya Ole ohin'wiye? Ni oniweryaneya tjayi winwiya Ole ohilaleiye? ¹⁵ Ni niwerya tjayi olaleya, wohikhala atthu oorumiya? _ Ntoko elepiyaya: ''Tooreriya ale anilaleya ihapari tjorera!''. ¹⁶ Numala khahiyo otene ahinwa Ehapari. Waholo Yesaya ohimya: ''Apwiya, tipane amin'ni matju ihu?'' ¹⁷ Waholo nroromelo in'niwa mwaha wowinwa, ni winwa Molumo a Kristu. ¹⁸ Numala miyo kin'nilipela: ayo khayinwale? Aayo, weekhweeli. ''Ntju naya nokhuwela elapo yotene, ni molumo aya mpakha woomalelani wa elapo''. ¹⁹ Wohiya eyo, kin'nilipela: Isarayeli khaatjuwela? Wopatjerya, Moise ohimya: ''Miyo kinawunlihihani ehatje wa ale ahikhalale elapo; wariyari wa elapo emotja wohiwananiya, Miyo kinamoviruwelani''. ²⁰ Ni Yesaya ohimya woohova: ''Miyo koophwanyiya ni ale Yahakipheela. Kihintjoniherya wa ale Yahakilipela.'' ²¹ N'hina wa Isarayeli, Oyo onihimya: ''Wakhula nihiku Miyo kihintjatherya matata Aka wariya wa atthu ohinwelela ni ootakhala''.