¹ Vano kin'nilipela tho: Muluku ohakhottha atthu Awe? N'nari. Waholo miyo tho ka mwisarayeli, nloko na Abrahamu, nihimo na Beexami. ² Muluku khakhottale atthu Awe, yayo atjuwelalyawe. Khn'nitjuwela tjinihimyaya Tjolepiya tja Eliya, nthinto oyo anlompawe Muluku mwaha wa Isayaleli? ³ ''Apwiya, ayo awinva maporofet'Inyu, ahanyanya altar'Inyu, ni miyo pahi kihalale, ni ayo an'niphela okumiha okumi aka''. ⁴ Numala, exeni amwakhulalyawe Muluku? ''Miyo kihivithela atthu Aka ikonto thanu napili yale ahinkokhorenle muluku a Bayali'''. ⁵ Tjitjam'mo tho, okathi ula wananano, akhala ahalale, mwaha wothanliya wa mahala. ⁶ Numala, wakhala mwaha wa mahala, numala khahiyo mwaha wa miteko. Wohikhala vo, mahala khiyakhala mahala . ⁷ Ni vano? Tjitthu Isarayeli oniphelawe, n'yo khaphwanyale, numala ale othanliya aphwanya, ni akina alipihiya murima. ⁸ Tjitjam'mo tjilepiyaya: ''Muluku ohavana n'nepa wokwakwatthuwiha, maitho wira ahoneke, ni maru wira ahinweke, mpakha mahiku a olelo''. ⁹ Vano Davidi onihimya: ''Wametja winyu wakhale ntoko ntthavi ni nrakho, nluku nookwakwatthuwa naya. ¹⁰ Maittho aya aripihiye wira ahoneke, ni makhata aya arukunuwe wohimala''. ¹¹ Ahakoha tho, ayo anukwattuliya wira emore ?wohikhalavo nthowa. Ohiya vo, mwaha wottettheya waya ohawela wopowa amalapo, numala wanlihiha ehatje. ¹² Vano, ottettheya waya wari othatjiri wa nlaponi, ni orimela waya wari othatjiri wa amalapo, wunnuwa waya onrwa okhala tjayi? ¹³ Vano okathi ola kinnuhimeryani, amalapo, nkwaha mmotja kiryaka nrummwa a amalapo, kinnivuwiha omwenyaka. ¹⁴ Miyo kokhala oowanlihiha ehatje ale akhalale a nnamani mwaka, ni, akhala, akina akhalale oowopowa. ¹⁵ Vaholovaya, othanya waya wituthuwa wa elapo, onrwa okhala wakhulela waya, wohikhala okumi wa alipa okhwa? ¹⁶ Wakhala wira mihokhorokho tjopatjerya ti tjowarya, erutthwene tho ti yowarya; Wakhala wira mitathari ti tjowarya, iritta tho ti tjowarya. ¹⁷ Vano, yakhala eritta emotje emotja ehononeyale, ni nyuwo, ya n'hokhorokho wa ntakhwani, motakanihiya ni yayo,ni mokhala ni yayo wa ntathari mulupale wa n'hokhorokho wa olivera, ¹⁸ n'hivuwihe n'hina mwa iritta.Numala, mwaivuwiha ,n'tjuwele wira khahiyo nyuwo munreriha mitathari, numala mitathari ti tjinorerihani nyuwo. ¹⁹ Nyuwo vano n'nahimya: ''Iritta tjihikitthiya wira miyo kakuve wun'nuwa''. ²⁰ Ekhweeli! Mwaha wohamini waya, ayo ahikitthiya, numala nyuwo n'nakhala mwaha wa nroromelo ninyu. N'hintjupuweleke ventji nyenyuru, numala moove. ²¹ Okhala wira, wakhala wira Muluku khamorelale ikhararri iritta tjakhalayi, ni tho khonikela wohiyani. ²² Moone, vano, orera ni okhanyererya wa Muluku. Wa mphantti m'motja, okhanyererya onawela ayuuda yayo amorale; numala wa mphantti nkina, orera wa Muluku ohowelani nyuwo, wakhala mwathipelela morerani Mwawe. Wohikhala vo, nyuwo tho n'namwikitthiya. ²³ Ni ayo tho, yahithipelele ohamini waya, anamwin'nuwihiya tho.Waholo Muluku on'niwerya owun'nuwiha tho. ²⁴ Okhala wira, waarokhala mwikitthiye woliverani wakhalayi ni, wovirikana ephattuwelo, muhin'nuwihiya wooliverani worera, otepa tho ayuda, ari iritta tja ephattu, anamwin'nuwihiya tho wooliverani waya? ²⁵ Okhala wira, axin'na aka, miyo nkiniphavela wira nkhale wohitjuwela evitho ela, wira n'hitjuweleleke m'mupuweloni mwinyu. Evitho ela tiyiraneyale wira Isarayeli alipihe murima, mpakha ophiya wun'nuwa wa amalapo. ²⁶ Tjitjam'mo, Isarayeli otene onamopowa, ntoko tjilepiyaya: ''Mopoli onwa Osiyoni. Oyo onakumiha ohivilela wa Yakobi. ²⁷ Ni n'no onakhala watana waka ni ayo, okathi onikelaka okumiha tjoottheka tjaya''. ²⁸ N'hina wa Ehapari, ayo an'ninyokhiya mwaha wa nyuwo; wa tjotene, n'hina yothanla ya Muluku, ayo afentiya mwaha wa atthu avirale. ²⁹ Waholo itthuvo ni wihana wa Muluku khoniviraka. ³⁰ Waholo, ekhalayi, khimwamwiwelela Muluku; numala, vano, n'hakhela mahala mwaha wohiwelela waya. ³¹ Tjitjam'mo tho, ayuda ala khaniwelela. Yowakhula ti wi, mwaha wa mahala moniheriyenyu nyuwo, ayo vano anamwakhela mahala. ³² Waholo Muluku ohahela otene n'hina mohiwelela, wira Oyo akhalane mahala wa atthu otene. ³³ Othatjiri wuntji ni otjuwela wa Muluku! Otjuwela winyu khoniveheya, ni iphiro tjinyu khatjinitjuwaneya! ³⁴ Waholo tipani atjuwelale mupuwelo wa Apwiya? Wala tipani akhalale namiruku Awe? ³⁵ Wala tipani anvahale etthu wopatjeryani, wira Muluku anttikiherye?'' ³⁶ Waholo tja Oyo, mwa Oyo ni wa Oyo tjiri tjitthu tjotene. Oyo avuwihiye wohimala. Amem.