¹ Vano, axin'na aka, miyo kin'nithipelela wira, mwaha wa mahala a Muluku, mwin'nyererye irutthu tjinyu ntoko nkuttho nkumi, owarya ni otthuneya wa Muluku, ori ottottepala winyu wowupuweleya. ² N'hittharihe elapo ela, numala mwiipake asya mwaha wa mupuwelo inyu n'sya wira ntjuwele ihapari tjoorera, yotthuneya ni yekhweeli otthuna wa Muluku. ³ Okhala wira, mwaha wa mahala kivahiyaka, miyo kinohimeryani wira wakhula ntthu a nyuwo ohintjupuweleke m'mantjawe ovikana wanirerelaya; numala ayo, opuweleke wootjuwela, attharihelaka nroromelo Muluku onkawelalyawe wakhula ntthu. ⁴ Waholo hiyo nookhalana miphantti tjintji mwa erutthu emotjaru, numala khahiyo miphantti tjotene tjinivara nteko m'motjaru. ⁵ Tjitjam'mo tho hiyo, niri entji, nin'nitakaniha erutthu emotjaru ya Kristu ni, wakhula ntthu, na miphantthi tja ntthu ni nkhwawe. ⁶ Hiyo nihana itthuvo tjoovirkana attharihelaka mahala wakhula ntthu akhelalyawe. ⁷ Wakhala wira etthuvo ya ntthu tiyolaleya, etthariheleke nroromelo. Wakhala wira etthuvo eyo ti ya nteko, arumeeleke. Wakhala wira etthuvo eyo ti yo wintthutjiha, intthutjiheke. ⁸ Wakhala wira etthuvo eyo tiyolipiha, alipiheke. Wakhala wira etthuvo eyo ti yo takaniha, atakaniheke worerela. Wakhala wira etthuvo eyo ti yoweettiherya, ettiheryeke ni nretele. Wakhala wira etthuvo eyo ti ya mahala, avaheke mahala ni ohakalala. ⁹ Nifento nikhaleke nohootha. N'yokheke tjotakhala; ntthareke tjorera. ¹⁰ N'hina wa nifento noomalela, nttharike nkina ni nkhwawe. N'hina wa nttittimiho, nttittimihaneke nkina ni nkhwawe. ¹¹ N'hina wotakanihana, n'hinyokheke. Nkhaleke oolipa mun'nepani, mwarumelaka Apwiya. ¹² N'hakalaleke moolipelelani oniwa. Nkhaleke oovilela mohawani. Nlompeke wakhula okathi. ¹³ Mwireleke mphantti wa tjitthu tjinitthuna owarya ni nwakheleke aletto. ¹⁴ Mwarelihe ale anolupatthani; mwarelihe ni n'hatakhaliheke. ¹⁵ N'hakalaleke ni ale anihakalala; munleke ni ale anunla. ¹⁶ Moonelaneke othunku nkina ni nkhwawe. N'hupuweleke nthinto wowikhurutula, numala nwakhuleleke atthu owiyeviha. N'hintjoneke okhala atthu otjuwela ni mentho inyu. ¹⁷ Ohikhale ntthu onikelinyu onliva yotakhala ni yotakhala. Mpakeke tjorera oholo wa atthu otene. ¹⁸ Waweryaneyaka, enikelinyu otthuna, nkhalaneke nrettele oteninyu. ¹⁹ Axin'na aka ofentiya, n'hittharattharaneke nyenyuru, numala nvaheke opuro onanariya wa Muluku. Okhala wira yolepiya: ''Ottharatthara ti wawaka; Miyo kinarowa ottikiha'. Anihimya t'Apwiya''. ²⁰ ''Numala nwananinyu avoliya etala, mwinvahe eyolya. Oyo avoliya ntthuna, mwinvahe matji owurya. Okhala wira mwapaka eyo, nyuwo n'narowa otakaniha makhala amoro wamuru wawe.'' ²¹ N'hihiye nxinttiyaka ni tjotakhala, numala nxintteke tjootakhala ni tjoorera.