¹ Wakhula ntthu owinweleleke akhulupale, okhala wira khakhalale akhulupale, ohiwa wa Muluku; ni akhalale arumiye ni Muluku. ² Vano, ole ohiniwiwelela akhulupale khonimwinwelela Muluku; ni ale ahiniwinwelela ayo onamwakhela olamuliya wa yayo. ³ Waholo akhulupale khanoopiha wa miteko tjoorera, numala wa miteko tjoonanara. Khan'nitthuna owoova akhulupale? Mpakeke tjoorera, ni n'namwakhuleliya. ⁴ Okhala wira oyo nrumeyi a Muluku wa nrettele inyu. Numala, mwapaka yoonanara, mooveke, okhala wira ayo khanikuxa ekata wohikhala etthu; waholo nrumeyi a Muluku, nttharatthara a wa ale anipaka tjonanara. ⁵ Vano, n'hana winwelela, khahiyo mwaha woonanariya pahi, numala tho mwaha wowupuwela. ⁶ Ti vo, nvaheke yotakanihana. Okhala wira akhulupale aninrumela Muluku, aniwehaweha tjitthu tjotene. ⁷ Mwaavahe otene enaarerela: a yotakanihana, ya yotakaniha; mposito, ya mposito; anirerela owoova, woova, a nttittimiho, nttittimiho. ⁸ N'hinlokihe ntthu etthu, wohikhala nifento nkina ni nkhwawe. Okhala wira ole oninfenta nkhwawe oninthharihela mikettelo. ⁹ Tjooruma: ''N'hiraruwe'', ''Nhive'', ''N'hin'ye'', ''N'hikhalele nrima etthu ya nkina'', ni wakhala tjokhala tjoruma tjikina tho, tjotene tjootakanihiya tjam'mo: ''Mwinfente nkhwinyu ntoko tjinin'ninfentinyu m'matjinyu''. ¹⁰ Nifento khan'niwana onyakulihana ni nkhwinyu. Vano, nifento wiraneya wa mikettelo. ¹¹ Mwaha wa eyo, nyuwo otjuwela okathi, wira ookathi woovinya mwinkhoveni. Waholo wananano wopowa wihu ohattamela ovikana naminihu wopatjeryani. ¹² Ohiyu woovikana, ni nihiku nin'nattamela. Nrowe, vano, nihiye miteko tja wiphini, ni naawaare akapwitthi a wowaryani. ¹³ Nrowe neetteke nthinto worerela, ntoko othana eriyari; khahiyo ni tjitthu tjowikhurutula wala tjoonan'hapaliya; khahiyo tjitthu tja ilavilavi tjooraruwa wala tjoviruwelana; khahiyo wa tjitthu tjonyakulihana wala nrima. ¹⁴ Numala munware yesu kiristu pwiyihu, ni n'hilyihe erutthu inyu, tjotthuna tjinyu.