¹ Nwaakhele ale ottettheya munroromeloni, numala wohilamula tjoolavuliya. ² Ntthu m'motja onikhalana nroromelo woolya wakhula etthu; nkina, ori oottettheya, onilya pahi makukhu. ³ Ole onilya wa tjotene ohinthanye ole ohinilya; ni ole ohinilya wa tjotene ohinlamule ole onilya, waholo Muluku oomwakhela. ⁴ Nyuwo mwa pani, n'ninlamula nanteko nkina? Oholo wa mwintthutjihi inyu oyo onaamora. Numala oyo onamwemela, waholo Apwiya toowerya anoonlipiha. ⁵ Ntthu m'motja on'niweha nihiku nimotja okhala nulupale ovikana nikina; nkina oniweha oolikana mahiku otene. Nihiye wira wakhula ntthu akhaleke nin'yele enupuwelawe m'muru mwawe. ⁶ Ole oniweha nihiku, onaaweherya Apwiya, waholo anvaheke mahala Muluku. Ole ohinlya, mwaha wa Apwiya ahilyeeke, ni tho anvaheke mahala Muluku. ⁷ Okhala wira khahiyo wa hiyo oninkhalela, ni khuvo oninkhwela. ⁸ Waholo naakhalaka, n'ninkhalela Pwiya, ni nakhwaka, n'ninkhwela Pwiya. ⁹ Okhala wira, wa yootthuna eyo, Kristu ohokhwa ni ahihimuwa, wira akhale Pwiya a atthu ookhwa ni akumi. ¹⁰ Numala nyuwo, n'ninlamulelani mun'ninyu? Ni nyuwo, n'nin'nyokhelani mun'ninyu? Waholo otene ihu n'narowa okhala oholo woolamuliya wa Muluku. ¹¹ Waholo yolepiya: ''Wekhweli Miyo kinikhalaka'', anihimya ta Apwiya,'' wa Miyo atthu otene anakokhora, ni malumi otene anan'vuwiha Muluku.'' ¹² Tjitjo, wakhula ntthu wa hiyo onarowa wintjakhulela wa Muluku. ¹³ Vano nihilamulaneke nkina ni nkhwawe; numala, wohiya eyo, okhaleke otthuna winyu wira ahikhale ntthu onikela ohela etthu yokwakwatthuwa wala nrakho oholo wa mun'na awe. ¹⁴ Miyo kotjuwela ni kookhalana ekhweeli wa Apwiya Yesu wira khivo enikhala yohiloka vekhaya, won'hiya ole onithokorerya wakhula etthu; wa oyo tiyohiloka. ¹⁵ Wakhala, mwaha wa yoolya, mun'ninyu on'niripiya murima, khan'netta n'nifentoni. N'hin'nyanye ni eyolyinyu ole Kristu ankhwelalyawe. ¹⁶ Vano, n'hihiye ele n'nithokorerinyu okhala yoloka ethanyiyaka. ¹⁷ Waholo Omwene wa Muluku khahiyo n'hina wa eyolya n'nakhala yoowurya, numala mwaha wekhweeli, nrettele ni ohakalala mwa N'nepa Wawela. ¹⁸ Waholo ole on'nrumela Kristu nthinto oyo on'nakheliya ni Muluku, ni oothanliya ni atthu. ¹⁹ Vano, niroweleke tjitthu tja nrettele ni tjininlipiha wakhula ntthu. ²⁰ N'hinyanye nteko wa Muluku mwaha wa eyolya. Tjitthu tjotene wekhweli titjorera, numala khahiyo yorerela ntthu onilya owana okwakwatthuwa. ²¹ Wan'nirerela ohikhura enama, n'nakhala ohiwurya evinyu, n'nakhala wakhula etthu enikela onkwakwatthuwiha mun'ninyu. ²² Ntjuweleke nyuwo ni Muluku n'hina wa tjitthu n'yo. Ooreriya tuule ohinintthukwela wa ele enaaminyawe. ²³ Ole onanyiherya onaatthukweliya alyavale, okhala wira khahiyo n'hina wa nroromelo; ni ehiniwa n'hina wa nroromelo etampi.