¹ Vano, exeni enikelihu ohimya? Nitepeke okhala ntampini wira mahala atepeke otjarya? ² N'nari! Hiyo nikhwaale wa itampi, n'nikela okhalaka tho tjayi mem'mo? ³ Khan'nitjuwela wira, tjitjam'mo nipatitjiyehu wa Yesu Kristu, ni tho nopatitjiya mookhwani Mwawe? ⁴ Vano, novithiya ni Oyo mwaha wa opatitjo wa mookhwani. Eyo yiraneyale wira, ntoko Kristu ohumusiyawe mwaalipa okhwa mwaha wa ovuwa wa Atithi, tjitjam'mo hiyo tho neetteke mookumini. ⁵ Okhala wira, wakhala ni'nilikana ni Oyo mookhwani Mwawe, ni tho n'notakanihana, mohihimuwani Mwawe. ⁶ Hiyo notjuwela ela: wira ntthu ihu wakhalayi wovithiya ni Oyo, wira erutthu ya itampi enyanyiye. Eyo yiraneyale wira nihipakiye tho ipottha tja itampi. ⁷ Ole okhwale on'nihaniya eekekhayi woohiya etampi. ⁸ Numala, nakhwa ni Kristu, ni'nikupali tho wira ninakhala mwa Yoyo. ⁹ Notjuwela wira Kristu ohumusiya mwalipa okhwa ni khokhwale tho. Okhwa khorina tho owerya wa Yoyo. ¹⁰ Waholo, numala okhwa mwaha wa itampi, Oyo okhwaale miphantti tjotene. Watjotene okumi Oyo onikhalawe, oninkhalela Muluku. ¹¹ Tjitjam'mo, mwintjoneke ntoko atthu okhwa waitampi, numala atthu ookhwa wa Muluku mwa Yesu Kristu. ¹² Vano, n'hihiye etampi yorumakani nrutthuni mwinyu munikhwaa, wira nttharuheleke tjinitthunaya. ¹³ N'hivahererye erutthuinyu ntampini, wira tjipakeliye tjitthu tjohiloka. Numala mwintjoniherye wa Muluku ntoko atthu okhwa vano anikhala. Ni moniherye erutthuinyu wa Muluku wira evareliye nteko wa ekekhayi. ¹⁴ N'hihiye etampi yoxinttakani, okhala wira khan'nirumiya ni Mikettelo, numala nri m'mahalani. ¹⁵ Ni vano? Nitthekeke okhala wira khanikhalale n'hina mwa Mikettelo, numala vathi wa mahala? N'nari! ¹⁶ Khan'nitjuwela wira yole n'nirumelinyu mun'nimwiwelela ni n'hana omwiwelela? Ekekhayi tiila: wala mwa ananteko a etampi enikuxa wookhwani, wala ananteko a wiwelela enikuxa wekekhayini. ¹⁷ Numala mahala a Muluku! Waholo mwaari ananteko a itampi, numala n'hana wiwelela ni ekekhayi wa murimani mikettelo tjiihaneliyenyu. ¹⁸ Mootaphuliya ntampini ni mpakiya ipottha tja ekekhayi. ¹⁹ Kinilavula ntoko ntthu, mwaha wa otteettheya wa n'namani mwinyu. Waholo, tjitjam'mo nvaherenrinyu erutthuinyu ntoko ipottha tja tjitthu tjoohiloka ni tjootakhala, tjitjam'mo, vano, mooniherye ntoko ananteko a ekekhayi moowaryani. ²⁰ Okhala, okathi mwarinyu ananteko a itampi, khamwarina ekekhayi. ²¹ Okathi ule, n'hokorokho xeni, vano, mwarinenyu wa tjitthu vano tjiniwulihani muru? Okhala wira omalela wa tjitthu n'yo ookhwa. ²² Numala vano, ntaphuliyenyu ntampini ni mpakiya ananteko a Muluku, n'nakhalana mihokorokho tjinyu tjoowarya, ni yookhumelela okumi yoohimala. ²³ Waholo waakhela wa itampi ookhwa, numala etthuvo ya mahala ya Muluku ekumi yoohimala wa Yesu Kristu, Apwiya ihu.