¹ Vano, owaakihiya mwaha wa nroromelo, nokhalana nrettele ni Muluku mwaha wa Apwiya ihu Yesu Kristu. ² Mwaha wa Oyo, ni tho nookhalana owerya, mwaha wa nroromelo, mahala ayo nirihu oolipa. Nin'nihakalala moolipelelani wira Muluku on'nivaha ya melo, olipelela wira nirele mphantti ovuwa wa Muluku. ³ Khahiyo eyo pahi, numala tho nin'nilipa mohawani mwihu, nitjuwelaka wira ohawa on'niwana ovilela; ovilela on'niwana othanliya; ⁴ ni othanliya on'niwana olipelela ya omelo. ⁵ Olipelela khoninyonyiha, okhala wira nifento na Muluku nin'nikhala wa murimani wihu n'hina wa N'nepa Wawela, ovahiyehu. ⁶ Waholo, nlelo okathi narihu ananttetthe, Kristu ohakhwela atthu ohamini okathi worerela. ⁷ Okhala wira khiwaweryaneya ntthu onkhwela ntthu a ekekhayi; eyo ti wi, wala ntthu wan'niweryaneya onkhwela ntthu onreerela. ⁸ Numala Muluku on'noniherya nifento nawe wa hiyo, okhala wira Kristu onikhwela hiyo, nlelo niryene anatampi. ⁹ Otepa wananano, ninakihiyehu ni ephome awe, ninamopoliya ni Oyo opwapwa wa Muluku. ¹⁰ Waholo, wakhala hiyo, okathi narihu awanani, notakanihiya ni Muluku mwaha wookhwa wa Mwana Awe, otepa tho numala otakanihiya, in'namopoliya ni okumi Awe. ¹¹ Khahiyo eyo pahi, numala tho nin'nikhala ni Muluku mwaha wa Apwiya ihu Yesu Kristu, n'hina wa Ole vano n'nakhelihu otakanihiya nwo. ¹² Vano, okhala wira etampi yookela nlaponi mwaha wa ntthu m'motja, tjitjam'mo okhwa wookela mwaha wa etampi. Ni okhwa ohaamwarela atthu otene, okhala wira otene attheka. ¹³ Waholo mpakha Mikettelo, etampi yiira enari nlaponi, numala etampi khenikhala etthu wohikhala Mikettelo. ¹⁴ Vano, okhwa ohoonaneya okhuma ni Adamu mpakha Moise, hata ale ahitthekale tjitjam'mo tjaatthekalyawe Adamu, eri ethonyeryo wa Ole aakela owa. ¹⁵ Numala, hata tjitjam'mo, etthuvo ya omahala khahiyo ntoko ohiwelela. Waholo, wakhala wira atthu otene akhwaale mwaha woohiwelela wa ntthu m'motja, otepa mahala a Muluku ni ovahiya wa omahala wa ntthu m'motja, Yesu Kristu, ohaphwanya atthu entji. ¹⁶ Okhala wira etthuvo khahiyo ntoko yowakhula ya yottheka ya ntthu. Waholo, wa mphantti nkina, olamuliya wa otthukweliya owaale mwaha woohiwelela wa ntthu m'motja pahi; numala, wa mphantti nkina, etthuvo ya omahala ewaale numala tjoottheka tjintji, wira okhaale wakihiya. ¹⁷ Waholo, wakhala wira okhwa owaale mwaha woohiwelela wa ntthu m'motja, otepa ale anakhela nahala ni etthuvo ya ekekhayi anakhalana omwene mweekumini mwaha wa ntthu m'motja, Yesu Kristu. ¹⁸ Vano, tjitjam'mo atthu otene atthukweliyaya mwaha woohiwelela wa ntthu m'motja, ni mwaha wa etthu emotja ya ekekhayi ohoowa wakihiya wa ekumi ya atthu otene. ¹⁹ Waholo, okhala wira mwaha wohiwelela wa ntthu m'motja, atthu entji apakiya anatampi, tjitjam'mo, mwaha wowiwelela wa ntthu m'motja, entji anarowa opakiya atthu a ekekhayi. ²⁰ Numala Mikettelo tjikelale wira ohiwelela otepe. Vano, vavale etampi etjaralyaya, mahala atepaxa otjarya. ²¹ Eyo yiraneyale wira, tjitjam'mo etampi erumalyaya mookhwani, tjitjam'mo tho mahala arume, mwaha wa ekekhayi, wa ekumi yohiimala mwaha wa Yesu Kristu, Apwiya ihu.