¹ Vano, exeni enikelihu ohimya Abrahanu, tithihu a n'namani, ophwanyalyawe? ² Waholo, wakhala wira Abrahamu ophukeliya mwaha wa tjowira, oyo nkhalana etthu yowivuwiha, numala khahiyo oholo wa Muluku. ³ Exeni enihimyaya Tjolepiya? ''Abrahamu onkupali Muluku, ni eyo ovahiya ntoko ekekhayi''. ⁴ Vano, wa ole onivra nteko, yowakhela khonivahiya ntoko yovahiya, numala ntoko yokopha. ⁵ Vano, ole ohonivara nteko, numala, wohiya eyo, on'nikupali Ole onintthuvela ohamini, nroromelo nawe on'nivahiya ntoko yotthuveliya. ⁶ Davidi tho on'nihimya mareliho wa ntthu yoyo Muluku onimpakelawe tja ekekhayi mwaha wohikhala miteko. ⁷ Oyo ohira: ''Areriya ale tjileveleliye tjottheka tjaya, ni itampi tjaya tjokhuneliya. ⁸ Oreriya ntthu ole Muluku ohininvahawe tjottheka''. ⁹ Tjitjam'mo, mareliho ayo ahimeriye atthu owun'nuwihiya, wala tho ohin'nuwihiya? Waholo nohimya: ''Nroromelo ovahiya Abrahamu ntoko ekekhayi''. ¹⁰ Vano, ovahiye tjayi? Okathi Abrahamu aryawe ohin'nuwa, ni an'nuwalene. ¹¹ Abrahamu ohakhela ethonyeryo ya wuun'nuwa, yeyo yaari yolipihiya ya ekekhayi ya nroromelooyo ahikhalana nlelo aryene ohin'nuwa. Yokhumelela ya ethonyeryo eyo tiwi oyo ookhala ntoko tithi a wa ale yaamini, n'namwi ahin'nuwihiye. Eyo enihimya wira yahivahiya ekekhayi. ¹² Ni tho enihimya wira Abrahamu tithi a wun'nuwa, khahiyo wa ale pahi owun'nuwihiya, numala, tjitjam'mo tho, anitthara ephiro ya nroromelo na tithihu Abrahamu ohinatthi wun'nuwihiya. ¹³ Okhala wira khahiyo n'hina wa Ikettelo Abrahamu amaneliyawe natiri ni maloko awe, natiri onihimya wira ayo yankhala anamahalana a nlaponi.Wohiya eyo, natiri oyo ovahiye mwaha wa ekekhayi ya nroromelo. ¹⁴ Waholo, wakhala wira ale anitthara Mikettelo anamahalana, nroromelo khahiyo ti na ekekhayi, ni natiri khonikhala etthu. ¹⁵ Okhala wira Mikettelo tjin'niwana opwapwa, numala, vavale wahikhalale mikettelo, khiwakhalale ohiwelela. ¹⁶ Ti vo, eyo mwaha wa nroromelo, wira natiri okhale owiraneya mwaha wa mahala, ni okhale oowiraneela anamwane a Abrahamu. Ni nlo khahiyo wa ale atjuwelale mikettelo pahi, numala tho ale anikhala ni nrorormelo na Abrahamu. Waholo oyo tithi a otenihu, ¹⁷ ntoko tjilepiyaya: ''Miyo kihopakani tithi a maloko mentji''. Abrahamu aari oholo wa Ole onroromelalyawe, wala, Muluku, yoyo onavaha okumi ale ookhwa ni onihana tjitthu tjohikhala wira tjikhale. ¹⁸ N'namwi aakhalanale ohawa onrukureryalene, Abrahamu ni ororomela ahivahererya okumi awe wa Muluku, ni khukhala tithi a maloko mentji, tjitjam'mo tjilepiyaya: ''Tjitjam'mo anarowa okhala maloko inyu''. ¹⁹ Oyo khakhalale oottettheya munroromeloni mwawe. Abrahamu ahamini wira erutthu awe pahi khiyawerya wayara anamwane, okhala wira aahikhalana iyakha tjoophiyaka imiya pili. Ni tho oyo ahiweha wira nipwipwi na Sara khinawerya tho on'yara mwana. ²⁰ Numala, mwaha wa natiri a Muluku, Abrahamu khakhalale wohamini. Wohiya eyo, oolipihiya munroromeloni ni khunvuwiha Muluku. ²¹ Oyo ahamini wira tthiri Muluku onawerya wiira ele yahimalyawe. ²² Vano, eyo ovahiya oyo ntoko ekekhayi. ²³ Khahiyo oreriya waari wa oyo pahi elepiyaya wira Muluku oonvaha ekekhayi. ²⁴ Numala tho elepiye wira nikhalane oreriya hiyo, okhala wira Muluku on'niweha ntoko atthu a ekekhayi, hiyo, ninmwamihi ²⁵ Ole on'humusale Yesu, Apwiya ihu, mwa aalipa okhwa. Yoyo iviye mwaha wa itampi tjihu ni khuhumusiya mwaha wa wakihiya wihu.