¹ Vano, tiyorera xeni arinaya ayuuda? Ni yorerelaya tivi wun'nuwa? ² Tiyulupale miphantti tjotene. Wopatjeryani, wa ayuda ahoniheriya ni ekekhayi ni Muluku. ³ Ni, wakhala ayuda akina khakhalale a ekekhayi, onarowa ohiloka waya okhaliha oloka wa Muluku ohikhala wa ekekhayi? ⁴ N'nari. Wohiya eyo, wira Muluku akhale a ekekhayi, ni wakhula ntthu okhale nawoothe. Ntoko elepiyaya: ''Wira moniye ntoko ntthu a ekekhayi m'molumoni mwinyu, ni wira nkhalane ovilela mwarowaka wolamuliyani''. ⁵ Numala, wakhala wira ohiloka wihu on'noniherya oloka wa Muluku, exeni nikhalalihu yoopaka? Wan'nirerela wira Muluku khahiyo ta ekekhayi mwaha wowana opwapwa waya? (Kinilavula kittharihelaka otjuwela wa n'namani.) ⁶ Khahiyo yeyo! Waholo, vano, Muluku akela olamula tjayi elapo? ⁷ Numala, wakhala wira ekekhayi ya Muluku, mwaha wa wotha waka, on'niwana ovuwa ventji wa Yoyo, mwaha wa xeni kinilamuliyaka ntoko natampi? ⁸ Ni mwaha wa xeni nihinirehu, ntoko atthu akina aniraya wohiloka wira nin'nihimya: ''Nipake yotakhala, wira yorera ewe''? Otthukweliya waya tiwekekhayi. ⁹ Ni vano? Ninintjakiha yohiru? N'nari. Waholo nihoniherya wira okhuma ayuda mpakha agreciya, otene atjareya itampi, ¹⁰ ntoko elepiyaya: ''Kharivo ntthu a ekekhayi, n'nakhala m'motja''. ¹¹ Khuvo onitjuwela. Khuvo oninrowela Muluku. ¹² Otene ahiya iphiro, otene akhala ntoko atthu ohirerela. Khavo onipaka yorera, n'nakhala m'motja. ¹³ M'milo aya mahiye otthukuliya. Molumo aya an'notha. Yokhala evenenu ya enowa n'yanoni mwaya. ¹⁴ N'yano tjaya tjotjareya otakhala ni owawa. ¹⁵ Metto tjaya tjin'nitthimakela orowa opaka tjitthu tjotakhala. ¹⁶ Onyanyiya ni ohawa ori mphironi mwaya. ¹⁷ Ayo khatjuwelale iphiro tja nrettele. ¹⁸ Khorivo omova Muluku m'menthoni mwaya. ¹⁹ Vano, notjuwela wira tjotene tjinihimyaya Mikettelo anihimeriya anitthara Mikettelo, wira n'yano tjotene tjimalihiye ni atthu otene arowe wolamuliyani wa Muluku. ²⁰ Okhala wira khuvo onirowa olamuliya itthariheliyaka Mikettelo . Waholo mwaha wa Mikettelo on'niwa otjuwela itampi. ²¹ Numala vano, wohikhala Mikettelo, ekekhayi ya Muluku ehoniheriya namona mwaha wa Mikettelo ni maprofeta, ²² eyo ti wi, ekekhayi ya Muluku, mwaha wa nroromelo na Yesu Kristu, wa ale otene anamini. Waholo khorivo ovalanyiya. ²³ Okhala wira otene attheka ni ari ottaiwene ni Ovuwa wa Muluku, ²⁴ yakihiyaka ni mahala mwaha wa mahala a Yesu Kristu. ²⁵ Waholo Muluku onvaha Yesu Kristu ntoko nkuttho mwaha wa ephome Awe, mwaha wa nroromelo. Oyo onvahererya Kristu ntoko ethonyiheryo ya ekekhayi Awe, ni ovilela Wawe, ohiya ohaxa itampi tjipakiye khalayi. ²⁶ Eyo ehiraneya ntoko woniheriya wa ekekhayi Awe okathi wa nanano, wira Oyo okhale eekekhayi ni namalamula wa khula ntthu orina nroromelo wa Yesu. ²⁷ Ori vayi wikhurutula? Ohiiya. Onittharihiya exeni? Miteko? N'nari, numala onittharihiya nroromelo. ²⁸ Hiyo nin'nimaliha, vano, wira ntthu on'niphukeliya mwaha wa nroromelo khahiyo wettela Mikettelo. ²⁹ Wala Muluku Muluku pahi a ayuda? Khahiyo tho Muluku a amalapo? ³⁰ Ayo, ni amalapo. Wakhala, wekekhayi, Muluku m'motjaru, Oyo onarowa ophukela wun'nuwa mwaha wa nroromelo, ni ohin'nuwa wa nroromelo. ³¹ Hiyo, vano, nin'nihiya Mikettelo mwaha wa nroromelo? N'nari! Wohiya vo, hiyo nin'nettela.