¹ Vano nyuwo khanrina yowivithihana, n'nilamula; waholo, yeyo eninlamulaninyu nkhwinyu, n'nitthukwela nyenyu. Okhala wira nyuwo, n'nilamula, n'nipaka tjitthu tjimotjaru. ² Numala hiyo notjuwela wira olamula wa Muluku onitthara ekekhayi wa ale anipaka tjitthu tjotakhala. ³ Numala nttharihe ela: wakhala nyuwo, n'namula ale anipaka tjitthu n'yo, nlelo nyuwo n'napaka tjitthu tjimotjaru, n'nikela ovira tjayi olamula wa Muluku? ⁴ Wala n'nakhotta othaatjiri wa orera Wawe, olevelela wawe ni ovilela, n'hitjuwelaka wira orera Wawe onitthua okuxeni wira mwintuthuwe? ⁵ Numala mwaha wa olipa ni ohituthuwa wa muriminyu n'nitakanihinyu wa nyuwo opwapweliya nihiku na opwapweliya, nihiku nowoniheriya olamula wa ekekhayi wa Muluku. ⁶ Oyo onarowa onvaha wa khula ntthu attharihelaka wa tjopaka tjawe: ⁷ wa ale, akhanyereryaka opaka tjitthu tjorera, anirowela ovuwa, ottittimiheya ni ekekhayi, Oyo onarowa ovaha okumu wohimala. ⁸ Numala onawa opwapwa ni otakhala wa ale otakhala murima, ahinitthara ekekhayi, numala anitthara tjitthu tjowothiya. ⁹ Muluku onawana ohawa wuntji wa atthu otene apakale tjitakhala, wopatjerya ayuda ni agregu. ¹⁰ Numala ovuwa, nttittimiho ni nrettele wa atthu otene anipaka tjorera, okhuma ayuda mpakha agregu. ¹¹ Waholo Muluku kharina ovalanya, ¹² okhala wira otene atthekale wohikhala mikettelo ni wohimikettelo anarowa okhwa, ni ale atthekelale mikettelo wa mikettelo anarowa ophukeliya. ¹³ Waholo khahiyo ale aninwa Mikettelo tja Muluku ari a ekekhayi, numala anivara Mikettelo tanikela olamuliya. ¹⁴ Okhala wira, okathi amalapo, ahirina Mikettelo, anipaka tjitthu tja n'namani tjitthu tja Mikettelo, ayo Mikettelo tjaya, n'namwi ahirina Mikettelo. ¹⁵ Ayo anoniherya wira tjitthu tjiniraneya M'miketteloni tjilepiye wa murimani waya. Mupuwelo aya tho namona aya wa tjitthu n'yo, ni mupuwelo aya on'navariha ni on'niwakiha. ¹⁶ Iyo tjinarowa wiraneya nihiku Muluku onikelawe walamula atthu otene, ottharihelaka ehapari aka, mwaha wa Yesu Kristu. ¹⁷ Numala, wakhala wira nyuwo n'nihaniya N'yuda ni n'nitthara Mikettelo, ¹⁸ ni n'nivuwiha Muluku, ni motjuwela enitthuna Awe, ni n'nitthara yorerela, okhala wira moleliheriya ni Mikettelo, ¹⁹ ni nyuwo mokhalana ekekhayi wira mun'niwettiherya atthu ahinona, mwa warya wa ale ari mwepiphini, ²⁰ mwintthutjihi wa ale ookhotta, mwintthutjihi a ale olipa eroho, ni mokhalana M'miketteloni otjuwela ni ekekhayi, vano eyo enihonona tjayi nthintho inyu wookhala? ²¹ Nyuwo n'niwintthutjiha atthu akina, khan'nintjintthutjiha? Nyuwo n'nilaleya wira nihiyeke, mun'nin'ya? ²² Nyuwo n'nihimya wira nihiraruweke, mun'niraruwa? Nyuwo n'nanyikha amuluku a ethiru, mun'nirowa wakulukhana? ²³ Nyuwo n'ninvuwiha M'miketteloni, mun'ninyokha Muluku mwaha wohitthara Mikettelo? ²⁴ Waholo tjitjam'mo tjilepiyaya: ''Ntjina na Muluku khan'nittittimihiya veri wa amalapo mwaha wa nyuwo''. ²⁵ Waholo win'nuwihiya, wekekhayi, etthu yoworerelani, mwattharihela Mikettelo; numala, mwahitthare Mikettelo, win'nuwa winyu khonikhala etthu. ²⁶ Wakhala, vano, ole ohin'nuwihiya onettela thotthuna tjawe Muluku, ohin'nuwihiya wawe khonikhala ntoko wun'nuwa? ²⁷ Ni ole on'nuwihiye, apweha Mikettelo, khonirowa witthukwa m'mentjawe, wira, n'namwi tjiryene Tjolepiya ni wun'nuwa, khan'ninwelela Mikettelo! ²⁸ Waholo khahiyo n'yuda pahi ori ota; ni khahiyo owun'nuwa pahi ota wa erutthu. ²⁹ Numala n'yuuda ekekhayi n'hina, ni wun'nuwa ti wa murima M'munepani, khahiyo otthara tjolepiya. Ovuwa wa ntthu oyo khoniwa wa atthu, numala wa Muluku.