¹ Paulo, nanteko a Yesu Kristu, ihaniye wira akhale nrumwa, avalaanyiye wira alaleyeke Ehapari ya Muluku, ² yoyo Oyo am'manelalyawe natiri n'hina wa maprofetawe n'hina mwa Tjolepiya Tjorera, ³ mwaha wa Mwana Awe, yoyo awale n'hina mwa nloko na Davidi n'namani, ⁴ mwaha wa ohihimuwa wa alipa okhwa, Oyo ohimiya okhala Mwana a Muluku owerya mwaha wa N'nepa worera, Yesu Kristu, Apwiya ihu. ⁵ Mwaha wa Yoyo, hiyo nin'nakhela mahala ni okhala arum'mwa wira nikhale owiwelela munroromeloni mwa ilapo tjotene, mwaha wa ntjina Nawe. ⁶ N'hina wa ilapo tjen'yo, nyuwo tho mun'nihaniya wira nwirele mphantti wa Yesu Kristu. ⁷ Nyuwo otene, ofentiya ni Muluku muri Oroma, ni mwihaniye wira nkhale owarya: mahala ni nrettele, onikhuma wa Muluku, Atithihu, ni Apwiya Yesu Kristu. ⁸ Wopatjeryani, kin'ninxukhurela Muluku Aka, n'hina mwa Yesu Kristu, mwa nyuwo otene, okhala wira nroromelo ninyu nin'nihimiya elapo yotene. ⁹ Waholo Muluku, Yoyo kininrumelaka m'munepani mwaka N'haparini ya Mwana Awe, namona aka tjitjam'mo miyo kinohimeryakani ¹⁰ m'mavekeloni mwaka, kilipelaka wira, wa mphantti m'motja, mwaha wa otthuna wawe Muluku, miyo kinamoxukuryani. ¹¹ Okhala wira kin'niphavela wowehani, wira kirele mphantti ni nyuwo etthuvo ya m'munepani, wira nkhale oolipihiya, ¹² eyo ti wi, wira nkhale otene oolipihiya, n'hina wa nroromelo na khula ntthu, nawinyu ni nawaka. ¹³ Ni nkhiniphavela, axun'na, wira nliyale wira wakhula okathi kin'nihimya wira kinawa kooxukuryeni (numala mpakha okathi ula va), wira tjiphwanyaneye wa nyuwo mihokorokho, ntoko tho amalapo akina. ¹⁴ Miyo kin'niphaveleya okhuma ogregu ntoko tho atthu owa, wa ale otjuwela ni ahinitthuna otjuwela. ¹⁵ Ti vo, wa miyo, kolikanana olaleya ehapari nyuwo tho nri Oroma. ¹⁶ Okhala wira miyo nkinona ehaya mwaha wa ehapari, waholo eyo owerya wa Muluku wira yopowe ale otene anamini, wopatjeryani ayuda numala agregu. ¹⁷ Okhala wira wa Yeyo ekekhayi ya Muluku en'nonaneya, wa nroromelo ni nroromelo, ntoko tjilepiyaya: ''Ntthu a ekekhayi onarowa okhala mwaha wa nroromelo''. ¹⁸ Okhala wira onanariya wa Muluku on'nonaneya wirimu wa tjitthu tjohiloka ni tjohikhala tja ekekhayi, ¹⁹ waholo etjuweliye ni Muluku en'noneya wa yayo, waholo Muluku on'nintjoniherya wa yayo. ²⁰ Okhala wira tjowatjereriya tjawe tjihinoneya, otepaxa owerya Wawe wohimala ni nkhalelo Awe, tjin'noniheriya okhuma opattuxiya wa elapo, mwaha wa tjitthu tjopattuxiya. Ti vo, in'yo khatjinikhotteya. ²¹ Waholo, n'namwi antjuwelaka Muluku, khanvuwihale ntoko Muluku, n'nakhala khavahiye mahala. Wohiya eyo, ihikhaliha alolo m'mupuweloni mwaya, ni mirima tjaya tjotakhala tjotjareya epiphi. ²² Yihimyaka okhala atthu ootjuwela, apakeya alolo. ²³ Ayo avirikaniha ovuwa wa Muluku ohinikhwa ni elatarato ya ntthu onikhwa, tjitjam'mo ntoko tja ipalame, inama tja metto mitjese ni tjikina. ²⁴ Vano, Muluku ohavaha tjotjivela tja mirima tjaya wa oraruwa, wira ahittittimiheke erutthu aya, ²⁵ waholo avirikaniha ekekhayi ya Muluku ni tjitthu tjowotha, attottopelaka ni arumelaka tjitthu tjopattuxiya an'hiyaka Ole Opattuxale, yoyo onivuwa wohimala. Amem. ²⁶ Mwaha wa etthu yela, Muluku ohavahererya tjotjivela tja ehaya, waholo, ntoko axaraya avirikaniha tjowira tjaya tja n'hina ni tjikina tjiri tjovirikana ni tja ephattu, ²⁷ ntoko axilopwana ahiya okumana ni athiyana tjiri tja ephattu ni anapaka tjitthu in'ya ni alopwana akina, nlopwana ni nlopwana, apakaka tjitthu tjohirerela, yakhela ehukhumu mwaha wa tjowira tjaya tjotakhala. ²⁸ Ni mwaha wa ohiwelela otjuwela wa Muluku, Muluku mwanene ohavaha mupuwelo wokhottiya, wira apakeke tjitthu tjohiloka. ²⁹ Atjareya tjitthu tjohikhala ekekhayi, ohiloka, nrima ni tjotakhala; atjareya nrima, winva, onyakulihana, win'ya ni ophavela tjitthu tjotakhala; ³⁰ atthu owotha, atthu oven'ha, awanani a Muluku, atthu otakhala, atthu oonyima, owikhurutula, anipakelela tjitthu tjotakhala, ³¹ khaniwiwelela axitithi aya, kharina mupuwelo, ohiroromeleya, kharina nifento ni mahala. ³² Ayo atjuwela atthukwela wawe Muluku, wira atthu anipaka tjitthu tjene tjen'yo anirerela okhwa; numala khahiyo anopaka pahi, numala tho an'natjivela atthu anipaka tjitthu tjene tjen'yo.