¹ Muluku, APWIYA Muluku annilavula annathukumanya atthu a nlaponi motene, okhuma ophattuwalyaya ntjuwa mpakha onkel'aya. ² Okhuma oSiyoni, nttetthe awe worerexa, Muluku ohoniherya waarya wawe worera. ³ Muluku'ehu onawa, ni khanrwaa omala; onniholiya ni moro w'owali, eyupuri yowopiha enninrukurerya. ⁴ Owo onn'ihana erimu, n'ilapo ya vathi, wira tjikhale anamona omilattuni w'awe. ⁵ Nkithukumanyerye vava atthu aka, yawo yatanale ni miyo ekihelelaka nkuttho. ⁶ Erimu ennilaleya etjariy'aya, vano Muluku mwanene etjariya. ⁷ Iwani, atthu aka, miyo kinrwaa olavula; kinuhimya tjottheka tjinyu, atthu a Israyeli; miyo k'APWIYA Muluku'enyu. ⁸ Nkinuviruwelani mwaha wa mikuttho tjinkihelelinnyu, okhala wira mikutthi tjinyu tjopahiya nanlelo tjiri wa miyo. ⁹ Nkinramela imompe tja vapuwani venyu,nnakhala ipuri tja nikoto ninyu; ¹⁰ Inama tjotene tja ntakhwani ti tjawaka, tjitjo-tho mihuwo tjihinalikeleya omwako. ¹¹ Kinnatjuwela axinuni otene o'mwako, n'itthu tjotene tjikumi tjinetta ntakhwani ti tjawaka. ¹² Miyo etala yakivola, nkimphavela wuhimeryani, tthiri elapo, n'itthu tjotene ti tjawaka. ¹³ Nnona wira miyo nkinkhura enama ya imompe, wala nkinwurya ephome ya ipuri? ¹⁴ Ottottopela Muluku ti nkuttho w'ekhweli, ni wamaliha anatiri yamanelalinnyu. ¹⁵ Nkitthane nihuku nohawa; miyo kinawopolani, ni nyuwo nnakitthapela. ¹⁶ Nto Muluku onnin'himerya nlip+a ottheka wira: Mwinlaleryani n'ikano tjaka, mwinttottopelani watana waka? ¹⁷ Vano nyuwo munnikhotta olakiya, khamwinthokorerya tjoruma tjaka. ¹⁸ Mwanweha nawiye, nyuwo munninkhaliherya wiya; munnitthuka nloko n'anamararuwa. ¹⁹ Mwano mwinyu munnikhweliya olavula tjotakhala, nlumi ninyu ninnilavula tjowotha. ²⁰ Mwavanelaka munnimotherya mmutj'innyu, munnihonona ottittimiheya wa munninyu. ²¹ Nyuwo mwiraka tjitja, miyo kimaleke; Nnupuwela wira miyo kinalikana ni nyuwo? Miyo kinnuhimyani, kiwoniheryeni tjotakhala tjinyu tjotene. ²² Mupuwelele, tjitthu, n'ya, nyuwo munkiliyala miyo; wira miyo kihuthalakatjeni , ahikhalaka onwerya owakihani. ²³ Oxukhuru ti nkuttho onkivuwiha, onettela etjariya, miyo kinamoniherya wopowa wa Muluku.