¹ APWIYA nkimorele ikharari, ho Muluku aka, nutthuna winyu; ntjipihe itampi tjaka n'ulevelela winyu. ² Kireriheni tjonanara tjaka, kileveleleni itampi tjaka. ³ Miyo kinnihimya tjkotsa tjaka, mahuku otene tjottheka tjaka tjinnikilemela. ⁴ APWIYA kihutthekelani nyuwo, nyuwo pahi,kopanka tjonanara vamethoni venyu; tjitjo mwakittaruxa kinettela exariya mwakihukhumu nnakirela tjimphwanelaka. ⁵ Nto mone APWIYA miyo kotakhala oyariya wene, amayaka akiyarale otthek'ene. ⁶ Nyuwo munnikiphavelela nrima w'ekhweli, n'hatjariha ankhili mmurimani mwaka. ⁷ Ntjipihe etampi aka, kikhale owarya; nkirapihe, kinurera ovikana ntjuwa. ⁸ Nkihokoloxerye otteliya nrima n'utthapa, nlipihe makhuv'aka, yintakatsalinnyu, ehakalaleke. ⁹ N'hiwehe tjottheka tjaka, ntjipihe tjottheka tjaka tjotene. ¹⁰ kivaheni nrima w'oloka, ho Muluku aka nkiwanele eroho y'ekhweli. ¹¹ N'hikomole vamethoni venyu, n'hikakhe eroho'enyu yowarya miyo. ¹² Nkopole nkivahe-tho otteliya nrima, nlipihe nrimaka nkhalihe w'owinwelela. ¹³ Nave miyo kinawinttutjiha anatampi iphiro tjinyu, ale athwelelale anuhokolela wa nyuwo. ¹⁴ Nkopole tjotakhala ni ephominnyu yowopola, ho Muluku, Muluku mopoli aka; ni nlumi naka nnulaleya orera winyu nrima. ¹⁵ Ntthukule, APWIYA,eyano tjaka, ni mwano mwaka munulaleya orera winyu nrima. ¹⁶ Nyuwo khamuntjiveliya ni nkuttho wolivela itampi, vano kihikhalale miyo kuvahakani; nyuwo khamunkhurunuwa nrima n'inama tjopahiya. ¹⁷ Nkuttho oninvahaka Muluku ti nrim'aka wottharuwa; nyuwo n'hinyohole nrima wophweya ni wowiyeviha. ¹⁸ Nrerihe oSiyoni ntoko otthuna winyu; nkhaliherye itekiye-tho ixiri tj'oYerusalemu. ¹⁹ Nave nnatjiveliya ni mikuttho tjoloka, ni tjovaha tjopahiya tjomalela; inama tjinahitiya valtari venyu.