¹ Mwinwe ela, nyuwo atthu otene; nkiwiriyane, otene nyuwo mwinkhala nlaponi; ² Atthu otene nyuwo n'hinoneliya vatthu, athatjiri wamotja n'alipa ohawa nkiwiriyane. ³ Eyano tjaka tjinnuluma tjotjuwela; ni nrimaka onnitthokelela tjotjuwela. ⁴ Kinatheteya maru aka kinweke ethale; kinamulakani kipaka itjipo. ⁵ Mahuku ohawa nkinvelavela, okathi onrukureriyaka n'alipa okipuherya? ⁶ Awo anlipana mihakhu tjaya, annitjona mwaha wa ekuru tjaya. ⁷ Khavo onwerya omopola munnawe n'itjitjapo, nnakhala onttittiniherya Muluku ekumi awe, ⁸ (Tthiri ekumi khinliveliya ni ntjurukhu, ntjurukhw'ene khumphiyerya olivela ekumi). ⁹ Khumphiyerya omwakiherya ntthu mmahiye, wira akhle nkumi mahuku otene. ¹⁰ Ninnona wira atthu otene annokhwa, atjuweli ni ohitjuwela n'alolo; otene annahiyerya akina mihakhu tjaya. ¹¹ Mmahiye tanrwaaya okhalaka mwemmo anukhalamo wa mahuku otene, ni nlaponi munkhalaya munamukhaliyaka maloko ni maloko; ohiya wira yahivaha matjina elapo. ¹² Atthu akhanleru alupalexa khanlekela; analikana n'inama, tjimpweteya. ¹³ Mone emalelo y'ale aniiroromela mmantjaya; yale aniittottopa ni mihakhu tjaya. ¹⁴ Awo annivithiya ntoko ipuri, okhwa ti makamputsi aya; okhwa onamwahola; awo annivithiya nananoru mmahiye erutthu aya enrwaa wuntta, epiphi t'inp'aya. ¹⁵ Vano miyo Muluku onukopola, onakikumiha mwepiphini m'okhwa, vano owo onakirwaana oryawe. ¹⁶ Nhitikhine mwawehaka atthu oruwerya, ethukumanyaka mihakhu owannyaya. ¹⁷ Vankhwaya, khanwerya okusa etthu; mihakhu tjaya khatjinatthara ivithiyaka wamotja ni yawo. ¹⁸ Hata wira, enari akumi, yanittottopeliya, yiraka: Atthu annuttottopelani nyuwo mwapakaka tjorera mmantjinyu. ¹⁹ Nto yawo anrwaa otthara maloko axitithi aya, ni khanrwaa wona-tho warya. ²⁰ Atthu ale owintjona ni ahininwananeya analikana n'inama tjimpweteya.