¹ Nrimaka wotjareya molumo otthapela; kimwipelaka mwene ntjipo nna; nlumi naka nlikaneke ni nlipa olepa oratta. ² Muluku ahorerihani wa mahuku otene orera winyu onnivikana orera w'alopwana akina; mulumo'enyu t'ankhili ni t'oratta, tivo Muluku oreriheni mahuku otene. ³ Nvare nivaka ninyu nowerya winyu, moniherye; owerya winyu ni munnuwelo'inyu. ⁴ Ni n'ovuwa winyu, nrwee mwawanele ekhweli n'ixariya ni nrettele, ntata ninyu ninapaka tjothamaleya. ⁵ Matther'innyu t'othokolowa analukama mirima tj'awanan'innyu; maloko mentji anamuroromelani. ⁶ Muluku, ehitj'ennyu enakhala wohimala-tho; otokwen'innyu onniwettiha atthu ni exariya. ⁷ Nyuwo munnettela ekhweli munnikhotta tjotakhala; tivo APWIYA, Mulukw'ennyu ahuthanlelani eriyari ya mamwene otene, ahuttikitthelani makhura owarya. ⁸ TJowara tjinyu tjinninukhela orattene, makhura a emira ni a ithutu tja miri; mumpani mwinyu morerexa munniruma iyuma tja itjipo tjinuttelihani nrima. ⁹ Athiyana a vapuwani venyu akha asana a mamwene; ni apwiyamwene ari mono'ennyu wolopwana, aphwanelihiye ni maluku owarya ni orika. ¹⁰ Pwiyamwene nyu, nkinwe, ni nkiwehe, nliyale nloko ninyu, n'itthoko y'atithinyu. ¹¹ Mwene onnitjiveliya nurera winyu; mmwinweleleke owo, owo ti pwiy'enyu. ¹² Mwana a Tiro, athatjiri a nlaponi, annuttittimihani yuwanelakani tjovaha tjaya. ¹³ Pwiyamwene onkela enupa ya mwene; tjowara tjawe tjinnuntjereriha eyulupale awe. ¹⁴ Awaralene tjitja malaya orika ni orera onnirwaniya wa mwene; aholiyaka ni mwali ottuli wawe, axipatthani awe. ¹⁵ Otene aya annetta yipaka yopaka ilulu; ekelaka mumpani mwa mwene. ¹⁶ Ohiya axitith'inyu, nnakhalana asana entji owuntjereriha nloko ninyu; nnamwakhaliha yawo mapewe a nlaponi. ¹⁷ Ntjipo naka n'na nnamovuwihani okhuma olela mpakha onkelelihu; atthu otene anamutthapelani wa mahuku otene.