¹ Miyo kahihimya: kinupatsopa mwettelo aka wira kihittheke ni nlumi naka; alipa otakhala yakattamelaka, kinaphuta eyano tjaka kihilavulane. ² Kahikhal omala, kihihimyaka etthu; ohawa waka wahitepa wuntjerereya. ³ Nrimaka wahitjareya otjikula kivalavelaka tjitja, kahivya mmurimani mwaka; kahipatjerya olavula kikohaka wira: ⁴ APWIYA, nkihimerye, nihuku ninkhwaka, ni watta wa mahuku aka, kitjuwele oyeva wa ekumi aka. ⁵ Mone movukula mahuku aka, vamethoni vinyu ekumi aka khinoneliya vatthu; vano ekumi ya ntthu wakuva omala. ⁶ Vekhweli ntthu nkumi onalikana n'ipheyo envira, weteteya wawe wotene ti wethiru; owo onnithukumanya mihakhu, nto khanintjuwela oninthukumanyeryawe. ⁷ Vano, APWIYA, miyo kinroromela exeni? Miyo kinuroromelani nyuwo. ⁸ Nkakiherye tjotakhala tjaka tjotene; n'hatthuniherye alolo okitheya. ⁹ Nkilavula-tho, miyo kinukhala pahi ttu, ti nyuwo nkittarusale. ¹⁰ Nkumihe ohawa orinaka miyo; kihalale vakhani okhwa. ¹¹ Mmulumelaka ntthu munninttarusa, mwinnihonona tjitthu tjimphavelexawe; vekheli ntthu onalikana n'ipheyo vakhani. ¹² APWIYA, nwiriyane malompelo aka; mwinwe okhuwela waka; wunla waka ophiye wa nyuwo, vapuwani venyu miyo ki nletto; miyo ki nlipa owetta, ntoko axitithi aka akhalayi. ¹³ N'hikiviruwele-tho wira kimumuleke, kihinatthi miyo ovenya va n'urimela.