¹ Kihalipelela APWIYA, nuroromela wotene, ni ohinwa okhuwela waka. ² Owo okakiha munlittini mokhwa, munrattani nonanara ntoko oloko; ni ohela inawu tjaka wa nipuro nowumma; owo okikhavihera mwettelo aka. ³ Anakinthutjiha ntjipo naya nonanano, ntjipo nomvuwiha Muluku ahu: Ni entji anamona ni emovaka, ni yakhuwelelaka APWIYA. ⁴ Oreriwa tale anaroromela APWIYA yale ahinatana natthu owitjona; ni ahinatthara auluku ethiru. ⁵ Nyuwo, APWIYA Muluku aka, tjotikiniha ni mirirya tjiniirenlinyu tjulupale; khavo onlikana ni nyuwo; kaphavela olaleya n'uvuwiha tjen'yo, nto tjinnikattela kihinawerya walikelela tjen'yo. ⁶ Nyuwo khantthunale ikuttho nnakhala tjovahia tjen'yo; ti vo nyuwo mokitthukula maru; nyuwo khanrokale opaheriya inama wala mikuttho tjolevelela itampi. ⁷ Ti vo miyo kohimya wira: APWIYA miyo kiri va; kiwaale wira tjintthunennyu; ntoko tjitjale tjilepiyaya nlivuruni mwa ekono tja miyo. ⁸ Muluku aka, miyo kintthuna wira ele entthunen'nyu; ni kinnettela ekano tjinyu ni nrimaaka wotene. ⁹ Miyo kinulaleya orera winyu nrima mmithukumanoni motene; nkikhottale olaleya; nyuwo, APWIYA motjuwela. ¹⁰ Nkivithelale miyo ehapari yorera yowopola; mahuku otene kahivuwiha orormeleya winyu ni wopola winyu; nkakhuwale atthu a mmuthukumanoni orera winyu nrima n'uroromeleya winyu. ¹¹ Nyuwo, APWIYA aka, n'hihiye okimorela winyu ikharari; okiphenta winyu n'uroromeleya winyu okikhaliheryeke mahuku otene. ¹² Tthiri ovelavela n'uhawa onnikirukurerya; tjottheka tjaka tjinnikiripiha nrima, nkinwerya walikelela; tjen'yo tjiri tjowatta ovikana ekharari tja mmuruni mwaka, ni nrimaaka onnikiripa. ¹³ Xontte APWIYA Muluku aka, nkopole; APWIYA Muluku aka, mwakuveke nkikhaliherye. ¹⁴ Ale amphavela okipwetexa yuliye muru, enyoholiye; antteliya nrima n'uhawa waka yuliye muru emalihiye. ¹⁵ Ale ankitheya ankithanya yawo ethanyiye yuliye muru, yawo ankitheya ehimyaka: ''Ha-ha!'' ¹⁶ Vano ale anuphavelani etthapeke etteliyeke nrima ni nyuwo; anlaleya orera winyu nrima ehimyeke vohihiyererya wira: APWIYA t'ovuwa! ¹⁷ APWIYA wehani ohawa waka n'utakhaliya waka; APWIYA nkakuvele, nyuwo ntthyawelo naka ni nkhaaliheryo aka; Muluku aka n'hipitja-pitje.