¹ APWIYA, n'hiye oviruwa winyu, n'hikihukhumu n'unanariya winyu. ² Okhala wira matthere oviruwa winyu akihoma, nata ninyu nokiphita. ³ Mwerutthuni mwaka khivo etthu ekumi, mwaha wokiviruwela winyu; mmakhuvani mwka khivo etthu ehinyattiye mwaha wa itampi tjaka. ⁴ Tjottheka tjaka tjokitsamiha mmatjini mowinxa; tjokilemela ntoko muritti ohinweryaka otexa. ⁵ Kikhalale nlolo kiraka tjotakhala, tivo makhwatt'aka anninkha eyutte. ⁶ Kokhulumuwa kovela ni kihotjeya; kinnetta kunlaka nihuku notene. ⁷ Mmurimani mwaka motene mokiviha, khivo etthu ekumi mwertthuni mwaka. ⁸ Kotemwa kokhulumuwa nrim'aka wothuluwa; nkirere khuwela. ⁹ APWIYA, nyuwo motjuwela tjinunlelaka , munninwa wipulela waka. ¹⁰ Nrima onnikithukumela, ekuru tjaka tjokithyawa; metho aka aripiya ehinarya-tho. ¹¹ Apatthani n'anamwattamanani aka aphweliya ni makhwatt'aka; amutji aka khanikattamela-tho. ¹² Ale amphavela okinva akireya mirakho; ahinwanana okipwetexa mahuku otene annivanelela makhwelo aka. ¹³ Vano miyo kinalikana ni ntthu ohinwa, kinalikana ni ntthu ohilavula; nkiniwinwa yawo nkiniwakhula etthu. ¹⁴ Kinnittiyela maru aka nkintthuna wawiriyana, nkintthuna owakhulela ni waruwana. ¹⁵ Ti vo, APWIYA, miyo kinuroromelani nyuwo; APWIYA, Muluku aka, nwakhule nyuwo. ¹⁶ Okhala wira miyo kanihimya: N'hitteliyeke nrima mwaha wa miyo okathi onkwakwattuwaka, awo annitsinnuwiha wa miyo. ¹⁷ Okhala wira kokhulumuwa kihalale okhwa, ohawa waka ori mmakhuvani mwaka. ¹⁸ Ti vo miyo kinnuhimeryani tjottheka tjaka; kiri ohawa mwaha wa itampi tjaka. ¹⁹ Ti vo awanani aka nanlelo akumi, awo towerya ni tolipa; ni ale ankilupattha ni tjotakhala kharere; ²⁰ Kawirelaka tjorera awo ankirela tjotakhala, kaphavelaka wareriha awo anukitakhaliha. ²¹ APWIYA, n'hikinyanyale, Muluku aka, n'hikhale ottayi ni miyo. ²² Mwakuve nwe nkikhaliherye, APWIYA, mopoli aka.