¹ N'hinanariye mwaha w'atthu otakhala, nnakhala n'hakalele nrima ale anira tjotakhala. ² Tthiri awo anunyala ntoko malaxi nopaka ntjuwa, anamumma ntoko munyepu ohinrupeliya epula. ³ Mwaroromele APWIYA mwireke tjorera; nnakhalana ekumi yintji ni nrettele. ⁴ Otteliya winyu nrima olipihiye mw'APWIYA; awo anamuvahani tjotene tjimphelinnyu. ⁵ mwivahererye w'APWIYA n'uroromela awo anamukhaliheryani. ⁶ Owo onamoniherya ohittheka winyu ntoko warya; onathonyiherya exariyen'nyu yoniyaka ntoko othana eriyari. ⁷ Nkhale omala, mwaroromelaka APWIYA; n'hinyonyiye mwaha w'ale arina tjotene, mwaha w'awle anettela olavilavi ni wotha, . ⁸ N'hiviruwe, nthyawe oruwana; n'hiviruwe tjitthu n'ya tjiniwana ovelavela. ⁹ Okhala wira atthu otakhala anrwaa opweteya; nto ale anaroromela APWIYA anukhala ni nrettele vathi-va. ¹⁰ Atakhali anurimela nananoru, nyuwo nnamwaphavela, n'haphwanyeke. ¹¹ Nto atthu omala anureriya vathi-va, anukhala-mu ni nrettele womalela. ¹² Atakhali annahaxa anaxariya, annakhalela nrima annilumanyiha meno. ¹³ APWIYA annatheya alipa otakhala awo, annona wira nihuku notakhaliya waya nri vakhiviru. ¹⁴ Alipa otakhala annikokha miyura tjaya ni anninvarela xow'aya, wira ewinve alipa ohawa ni owin'yeviha, ni wira yapwetexe atthu oloka. ¹⁵ Nto yawo anuhomiya n'axowaaya yawo, miyura tjaya tjinamuntakatseya. ¹⁶ Tjitthu vakhani tjinnaphiyerya alipa ohawa khureriya mihakhu tjulupakle khatjinareriha atthu otakhala. ¹⁷ Okhala wira APWIYA annuntakatsa miyono tja alipa otakhala, annakhaliherya atthu a xariya. ¹⁸ APWIYA annakhapelela ale aniwinwelela, ni onnavaha tjorera tjihinimala. ¹⁹ Khananyanyala mahuku ovelavela, onnaphwanyiha yolya okathi w'etala. ²⁰ Nto alipa otakha anupweteya, awanani A'PWIYA anunyala yume ntoko munyepu ohirina matji; anulakatseya ntoko mwixi ontthuwa. ²¹ Alipa otakhala annikopha, khuhiliva-tho tjakophale aya; anaxariya khanimana etthu annivaha mahalene. ²² Ale APWIYA anarerihaya anureriya vathi-va; ale anatakhalihaya anupwetexiya. ²³ Ale anettela iphiro tj'APWIYA anureriya; mwettelo aya onnatjivela APWITYA. ²⁴ Yamora vale, khampweteya APWIYA annavarela ntata khuwemexa. ²⁵ Okhuma omiravo aka, mpakha va kuluvalalyaka; nkinanwehe naxariya anyanyaliyene ni Muluku, nkinawehe amutji awe elolaka yolya. ²⁶ Mahuku otene naxariya, onamorela ikharari othoiwa khunavaha; tivo amutji awe otene annireriya. ²⁷ Nkhotteke tjotakhala, mwireke tjrera; tjitjo nnakhalana ekumi yintji vathi-va. ²⁸ Tthiri APWIYA annaphenta atthu oloka, khananyanyala atthu awe: alipa otakhala anupwetexiya ehikhale-tho; awanani a Muluku anurimela ehikhale-tho. ²⁹ Anaxariya anamwakhela elapo yohiyeriw'aya, anrwaa okhalakamo mahuku otene. ³⁰ Eyano ya naxariya ennilavula tjutthu tjankhili, nlumi nawe ninnihimya tjitthu tjoloka. ³¹ Ekano tja Muluku awe tjinnikhala mmuruni mwawe; mavalo awe khanihapuwa ephiro ya tjariya. ³² Nlipa otakhala onninlupattha ntthu orera nrima, aphavelaka omwinva. ³³ Nto APWIYA khanrwaa onvahererya mmatatani mwawe; khanunnyanyala omilattuni. ³⁴ Mwaroromeleke APWIYA, mwinweleleke tjoruma tjaya, awo anamuvani ekuru tjowettiha elapo; nyuwo nnamweha alipa otakhala epweteyaka. ³⁵ Miyo kahunweha ntakhali otjareya wintsona itsunnuwihaka ntoko mwiri nkithi, ntoko ari mwanene elapo. ³⁶ Nihuku nomalo kahivira-tho vavale khuhimona-tho; kahimphavela, khuhimphwanya-tho. ³⁷ Nkanweheni naxariya, nkanweheni ntthu oloka; ale aniphavela winwanana anukhalana otjulu muntji. ³⁸ Nto alipa ottheka otene anupwetexiya wamotja; etthoko y'atakhali enumalihiya. ³⁹ APWIYA anniwopola anaxariya, anniwakiha okathi wovelavela. ⁴⁰ APWIYA annakhaliherya, ni anniwopola; anniwakiherya mmatatani mw'alavilavi, annatsunka, mana anthyawela mwa yawo.