¹ Otakhala wa ntthu toninkhanyereriha wira etampi oninkhotta Muluku khunimova. ² Natampi onnitsona okhala ntthu onnittottopa mmantsawe khuniweha itampi tjawe n'uttharuwa. ³ Mulumo awe otene wotha n'utakhala; onnikhotta miruku khanira tjorera. ⁴ Hata ohiyu arupathiki onnitthokolela wira tjonanara; onnikhalela nthiti mwettelo wonanara khanihapuwa ephiro ya tjottheka. ⁵ APWIYA, onifenta winyu onkhuma otjulu, ororomeleya winyu onnivikana mekhulu. ⁶ Etjariy'ennyu ti yolekela ntoko miyako tjorakamexa tja Muluku, otthuna winyu ti wothamaleya ovikana wixa wa mphareya; nyuwo, APWIYA, nyuwo munnatjuka atthu n'inama. ⁷ APWIYA, onifenta winyu, ti wororomeleya! okhala wira atthu annithyawela mwinrurini mwa mapuphen'nyu. ⁸ Anarupala ni tjolya tjotjiva tja mpani mwinyu; anawurya ehime yorera winyu nrima. ⁹ Maphattuwelo ekumi ti nyuwo nimwaleliyaka ni nyuwo ninnona oreriya. ¹⁰ Mwatsunke mofentani mwinyu ale anotjuwelani; mwarerihe ale anettela etjariyen'nyu. ¹¹ N'hahiyererye owintsona okinyanya, nnakhala awanan'innyu ehikiwerye. ¹² Mone atakhali amora; ayevihiya amoroseliya vathi, khanivenya-tho.