¹ APWIYA, mwavirikanye ale ankivirikanya; mwakumiherye ekhotto ale ankituphela. ² Nkuse iyuma tj'ekhotto ', nwe nkikhaliherye. ³ Nkuse mavaka, n'ikatana mwavirikanye awanani aka; nkoniherye: wira mwa mopoli aka. ⁴ Ale amphavela okinva, yuluya muru atakhaliye; ale amphavela okipwetxa ahokoloseriye ottuli yuliyene muru. ⁵ Ekhale ntoko ikokhola opheyoni; nlaikha n'APWIYA navavihe. ⁶ Mphironi mwaya ekhalemo epiphi n'ixa tjinkwakwattula; nlaikha n'APWIYA niwomole. ⁷ Awo akireya nrakho vohinlattu; akithipela ekhokwe kihitthekale etthu. ⁸ Otakhaliya wamorele vowatutusa; evarihiye ni nrakho wareyalaya, emorele nkhokweni athipalyaaya. ⁹ Tjitjo nrim'aka onamwatthapela APWIYA; kinutteliya nrima ni wopoliya winyu. ¹⁰ Makhuv'aka otene anuhimya: APWIYA khavo onlikana ni nyuwo, nyuwo munimwakiherya nlipa ohaxiya w'ale anin'haxa, munnimopola nlipa othoiwa wale animpuherya. ¹¹ Anamona owotha annikivirikanya; annikotherya tjotakhala tjihintjuwelaka. ¹² Awo annikilivela ni tjotakhala, tjorera tjinwirelaka kinnikhala vekha moxankani mwaka. ¹³ Nto miyo, vaweren'yaka, kaniwara mattapwatta; kanikhotta yolya kahawelaka, kanalompela vohihiyererya. ¹⁴ Miyo kakhaliha awo ntoko axulupalyaka wala apatthani aka; miyo kanetta oripiyeene nrima, ni wunlatseya ntoko kakhweliye n'amayaka. ¹⁵ Nto miyo kivalavelaka , awo athukumana n'utteliya nrima;ahinwanana okituphela kihitjuwelaka nlattu ene, annithipelela okihatjula. ¹⁶ Awo annikihaxa annitepa okitheya, annikitakhaliha annikilumanyerya meno. ¹⁷ APWIYA, nnaleva mpakha lini? nkopole kihihaxiye-tho; nkakiherye asana a'kharamu ala. ¹⁸ Tjitjo kinamutthapelani mmuthukumanoni mulupale; kinamovuwihani oholo w'atthu otene. ¹⁹ Awanani aka anawothe ale ehikitheye, ale anikinyokha vahinlattu ehikinyohole. ²⁰ Awo khanlavula tja nrettele; ohiya vo, anniwotherya atthu owiyeviha. ²¹ Awo annikihimya n'uveha ekhuwelaka wira: Ahe, hiyo nuweha tjiralinnyu! ²² Nyuwo, APWIYA, moweha; n'himale; APWIYA n'hikhale ottayi ni miyo. ²³ APWIYA nwe nkikhaliherye, Muluku aka, pwiy'aka, venyani nkakihe. ²⁴ nkiphuke nttharihelaka exariy'ennyu, APWIYA Muluku aka; n'hahiye awanani aka ekitheyaka. ²⁵ Ehihimye mmurimani mwaya wira; ha, nonwerya, nnakhala mmurimani mwaya! ehihimye wira: Hiyo nommirya! ²⁶ Ale antteliya nrima nuhawa waka yuliye muru emalihiye, ale anitsinnuwiha ekitheyaka ethenyiye yawo yuliye muru. ²⁷ Ale atteliya nrima n'uloka waka etthapeke; ekhuweleke vohihiyererya wira: APWIYA t'ovuwa, annaphavelela tjorera arumeyi aya. ²⁸ Titjo kinulaleya ororomeleya winyu, kuttottopelakani mahuku otene.