¹ Kinnattottopela APWIYA okathi p'ukathi; molumo aka anunvuwiha Muluku vohihiyererya. ² Nrim'aka onnittottopa mwaha w'APWIYA; alipa ohawa ekiwiriyane etteliyeke nrima. ³ Nlaleye ni miyo ovuwa wa Muluku ninnuwihe ntjina nawe otene wamotja. ⁴ Kahaphavela APWIYA. Aw akinwelela akakiherya tjowopiha tjotene. ⁵ Ale anweliheryale metho Muluku annitteliya nrima, ekhve aya khinuliya muru. ⁶ Nlipa ohaxiya okhuwela, ni APWIYA amwinwa; khumwakiherya tjotene tjan'haxa. ⁷ Malaikha A'PWIYA annatsunka ale anarormela,ni anniwakiherya tjotakhala tjotene. ⁸ Mwererye mone orere waya nrima APWIYA; oreriya t'ale anaroromela. ⁹ Nyuwo atthu a Muluku mwarumele APWIYA khivo enahalela ale aniwova. ¹⁰ Athatjiri anathaiwa anavoliya etala; anarumela APWIYA khivo enahalela. ¹¹ Anaaka, nwe, nkiwiriyane; kinawinttutjihani owova APWIYA. ¹² Ti pani omphavela okhala ekumi yintji, ni okhala mahuku menti ntteliyaka nrima? ¹³ Mpatspe nlumi ninyu wira nihihimyeke tjotakhala, mphuteke eyano tjinyu wira tjihilavuleke tjowotha. ¹⁴ Nkhotteke tjotakhala, mwireke tjorera; mphaveleke nrettele, ni mwetteleke. ¹⁵ APWIYA annakhapelela anatjariya anniwinwelela okhuwela waya. ¹⁶ APWIYA anniwomola ale anira tjotakhala, wira ehupuweliye-tho. ¹⁷ Atthu oloka yakhuwelelaka APWIYA anniwinwelela. Awo anniwakiha tjotene tjinavalaveliha. ¹⁸ APWIYA ankhala vakhiviru n'ale otemwa , anniwopola alipa otemwa. ¹⁹ Natxariya onnehereriya n'uxanka wuntji, vano APWIYA anuwakiha mahuku otene. ²⁰ Awo annitsunka ekumi awe; khannintiya nukhuva nawe nnakhala nimotja. ²¹ Ntakhali onamwinviya ni tjotakhala tjawe, ole oninkhalela nrima naxariya onatthukeliya. ²² APWIYA annitsunka ekumi y'arumeyi aya, ale antthyawela w'APWIYA khantthukeliya.