¹ Nwipele APWIYA, nyuwo atthu a tjariya; nyuwo atthu orera nrima munvuwihe Muluku. ² Mwatthapeleke APWIYA ni pankwe; nwipele APWIYA itjipo n'ikoma. ³ Nwipeleke APWIYA ntjipo na nanano; nwopeleke makuphi ni elulu ni ohakalala wulupale. ⁴ Molumo APWIYA t'ororomeleya; ni miteko tjaya tjtene tjinnitthara ikhweli. ⁵ Awo watjivela etjariya n'oloka; elapo yotene yotjareya orera waya nrima APWIYA. ⁶ Nulumo n'APWIYA nopattusa erimu; tjitthu tjotene tjipattusiye ni yowo ni ntju. ⁷ Awo t'athukumanyale matji a mphareya ti yawo athalelale mikano iphareya tjulupale; elapo y'atthu okhwa awo akhaliha nipuro nowatjukamo atthu okhwa. ⁸ Nyuwo atthu a ilapo tjotene, nwoveke APWIYA; nyuwo atthu a maloko otene mwattittimiheke yawo. ⁹ Okhala wira awo ahimya, olumwenku khuphattuwa; awo aruma tjitthu tjotene khukhalatja. ¹⁰ APWIYA annitepanya tjinivanelaya atthu a maloko otene; annihonona miteko tjulupale tj'atthu otene. ¹¹ Miruku tj'APWIYA tjinnikhala mahuku otene; tjinupuwelawe ni nlema nawe tjinnawela atthu otene a maloko ni maloko. ¹² Noreriya nloko Muluku aya akhalale APWIYA; nenno Muluku oithanlelalyawe okhala n'awawe. ¹³ APWIYA anniweha okhuma wirimu mpakha vathi; awo anniweha maloko otene a'tthu. ¹⁴ Wirimu onkhalawe Muluku onniniweha hiyo otene ninkhala vathi-va. ¹⁵ Owo tonipaka mirima tj'atthu otene; yowo tonitokotsa miteko tjaya tjotene. ¹⁶ Khavo mwene onlipa n'anakhotto awe entji, khavo nakhotto ekuru onitjopola mmantjawe. ¹⁷ Hata ikhavalo tjinntjela wopola okhottoni, ekuru tjaya tjulupale khatjintela etthu. ¹⁸ APWIYA t'anatjuka ale aniwova, ale anroromela orera waya nrima. ¹⁹ Awo annakiha iroho tjaya mokhwani, annavaha ekumi okathi w'etala. ²⁰ Nrim'ehu onnaroromela APWIYA; yawo tannikhaliherya ni tannakiha. ²¹ Otthapa wihu wotene onkhuma wa Muluku, okhala wira ninroromela ntjina nawe n'owarya. ²² Ofenta winyu, APWIYA onikhuruwele hiyo, mana hiyo ninuroromelani nyuwo.