¹ Miyo kinuroromelani nyuwo, APWIYA; n'hikihiye kuliyaka mueu mahuku otene; nkakiherye mwaha wa etjariy'ennyu. ² Nkitheterye marw'innyu, nkakuvele mowopihani; nkikhalele enup'aka yolipihiya, nkikhalele kako olipihiya kitsunkiyakamo wira kopowe. ³ Okhala wira nyuwo mwa nikhuku naka ni nlipiheryo naka; nkihole ni nkettihe mwa ntjina niniyu. ⁴ Nkikumihe mwintthavini kireiyalyaka, vano nyuwo mwa ekuru tjaka. ⁵ Mmatatani mwinyu kunnuvahereryani eroho aka; nyuwo APWIYA, mwinrwaa okopola, Muluku ekhweli. ⁶ Miyo kinnanyokha ale anakokhorela amuluku ethiru; vano miyo kinaroromela APWIYA. ⁷ Mwaha wokiphenta winyu miyo kinnitteliya nrima kinnitthapa, okhala wira nyuwo n'hona ohawa waka; ni motjuwela ovelavela waka. ⁸ Ni nyuwo khankivahereryale mmatatani mw'awanani aka; nyuwo mokihaputsa iphiro mwakipithelaya-mo. ⁹ APWIYA, nkonele othunku miyo, okhala wira miyo kovelavela; metho aka, nnep'aka, mmurimani mwaka tjotene tjokusiya n'uhawa. ¹⁰ Ekumi aka ennilala ni mixankiho, ni iyakha tjaka tjinnivira n'utjikula; ekuru tjaka tjinnimora n'uvelavela; ni makhuv'aka ahotjeya. ¹¹ Awanani aka otene annikinyokha anamattamanani aka annikitheya; apatthani aka annikituthuwa; kakumananaka mphironi annikitjhawa. ¹² Mmurimani mwaya koliyaliya, ntoko ntthu okhwale; kothanyiya ntoko mwapu wophweya. ¹³ Okhala wira kihinwa awanani aka ekotheryaka, wova wokirukurerya; awo ahinwanana okivirikanya, anniphavela okinva. ¹⁴ APWIYA, miyo kinnuroromelani nyuwo, mwa Muluku aka. ¹⁵ Ekumi aka eri mmatatani mwinyu; nkakiherye mmatatani mw'awanani aka ni otene ale ankilupattha. ¹⁶ Nkiwehe miyo nrumeyinyu n'owitho worera; nkopole nurera winyu nrima. ¹⁷ APWIYA, n'hikihiye miyo kuliyaka muru, vano miyo kinnukhuwelelani nyuwo; wira atakhali yuliye muru, emale mmahiye mw'alipa okhwa. ¹⁸ Mwamalihe anawothe awo, anitjona ni oveha, yawo anthanya atthu axariya. ¹⁹ Orera winyu nrima ti wulupale, munnatjukerya tjorera tjulupale ale onottittimihani! nyuwo munnarerela nrima ale anottittimihani, ale ahinuliya muru mwaha wa nyuwo, va methoni v'atthu otene. ²⁰ Nyuwo munniwakiha ni waphenta winyu mwatjukaka w'ale anphavelela tjotakhala; mwinnakhunela mumpani mwinyyu mwatjukka w'ale anavea anatheya. ²¹ Ettottopeliye APWIYA, vano okiphenta wawe wokirela tjotikinisa, wokitjuka nipuro nolipihiya. ²² Miyo kanihimya okathi woxanka waka: Kahona wira nyuwo mokinyanyala. Vano nyuwo n'hinwa olapela waka kukhuwelelakani. ²³ Mwaphenteke APWIYA, otene nyuwo munaphenta; APWIYA annatjuka ale aniwinwelela, ni annahukhumu nuhaxa ale anixinnuwiha. ²⁴ Nkhale olipa, ni awo anamulipihani mmurimani mwinyu, otene nyuwo munawehererya APWIYA.