¹ APWIYA yahun'himerya-tho Yona emara yonapili, yiraka: ² Nvenye, nrwee oNinive nttetthe mulupale, mwalalerye atthu a wonwo mutthaka ontthunaka wohimeryani. ³ Yona ahuvenya, ahinwelela yoruma y'APWIYA khurwaa oNinive, ntoko APWIYA yan'himeralyaya. ONinive wari nttetthe mulupale wamaliya mahuku mararu wettiyaka. ⁴ Yona ahetta mwinttettheni, nihuku nimotja, alaleyaka wira: Yamala mahuku miloko mitjese oNinive onrwaa opwetexiya. ⁵ Atthu otene oNinive yahumwinwelela Muluku; yahulaleya otthukwa, yahiwara mattapwatta, okhuma alupale mpakha akhani. ⁶ Nave-tho mwene oNinive ahinwa ehal'iyo, owo ahuvenya vehitjeni vawe, ahirula ekuwo tjawe tj'omwene, ahuwara mattapwatta, khukilathi vatturwani. ⁷ Numala ahulaleya yoruma yulupale, mwinttettheni, yahimya wira: Atthu n'inama ehilyeke etthu, ipuri n'imompe, tjihivahimahiye yolya, atthu n'inama ehiwuryeke; ⁸ Atthu n'inama ewre mattapwatta, envarele metto Muluku; khula ntthu attharuweke mwettelo awe wotakhala, ni miteko tjawe tjowali. ⁹ Khino Muluku onarwaa ottharuwa, n'uhiya oviruwa wawe, onanilevelela wira nihirimele? ¹⁰ Muluku ahuweha miteko tjaya tjotakhala, ehiyaka iphiro tjaya tjotakhala; tivo Muluku ahuhiya ehukhumu yalakelalyawe wakumiherya, khuhahukhumu.