¹ Yona ahalompa APWIYA Muluku awe, mmirimani mw'ehopa, ² Iraka: Movelavelani mwaka kinniwihana APWIYA, awo annikakhula; mowinxani mw'alipa okhwa kinnukhuwelelani nyuwo, nyuwo muhinwa okhuwela waka. ³ Nyuwo mokittikhela mowinxani mu, n'hina mw'epahari, matji annikiphunyererya miphantti tjotene; mawimp'inyu otene akituphela miyo. ⁴ Miyo kihupuwela wira: Konyanyaliya ni nyuwo; ni wira nkarwaa-to oweha enup'ennyu yowarya. ⁵ Matji akikhunela ahalale okittiya ephumu, matji owinxa akirukurerya; mikhoyi tj'okhwa tjokikhunela vamuru. ⁶ Kokhuruwela mpakha mitathari tja miyako; kokhuruwela nlaponi mw'alipa okhwa mikhora tjaya tjowaliya vatjulu vaka; mokikumiha mmahiyeni kinari nkumi, khoo APWIYA Muluku aka. ⁷ Okathi eroho aka yakirimelaya, kowupuwelani nyuwo APWIYA; olompa waka wophiya wa nyuwo mumpani mwinyu m'owarya. ⁸ Ale anthipelela wakokhorela amuluku ethiru annunyanyalani nyuwo muri oreriya waya. ⁹ Vano miyo kinuwimpelani matjipo otthapela; kinamuhelelani nkuttho kamaliheryaka anatiri kamnalyaka. Tthiri wopowa onkhuma w'APWIYA. ¹⁰ APWIYA yahiruma ehop'eyo yulupale, ehopa yeyo yahunrapheya vatthayani vowumma.