¹ Yona ahunanariya ventji nulevelela w'APWIYA, khuximwa. ² Vano ahalompa apwiya, iraka: Khoo, APWIYA, khahiyo etthu yela yahimalyaka kinari nlaponi mwaka wira mwarwaa walevelela? Tivo vakuvelalyaka otthyawela oTrisi; kantjuwela tthiri wira nyuwo mwa Muluku orera nrima ni othunku, opitsa oviruwa, ni owakuva olevelela, nttharuwaka tjotakhala tjolopolananinyu atthu. ³ Tivo vano, kovarelani metto APWIYA, nkuseke ekumi aka, halali kikhwe okhala nkumi wokipheela. ⁴ APWIYA yahu'himerya wira: Mwinnanareliyani? nyuwo munniviruwa vahinlattu. ⁵ Okathi owo Yona ahuvenya, khwemela ota wa nttetthe, ahuteka nxaxa mphantti w'onikhuma ntjuwa, khukilathi vanrurini vaya, aphavelaka oweha etthubyarwaa okhumelela mwinttettheni. ⁶ Vano APWIYA Muluku yahumeliha vavalemurapela, wannuwale vowakuveya onkhunelaka Yona ni nruri aya vamuru vawe, wira ankurunuse nrima; murapela owo wahuntteliha nrima Yona ventji. ⁷ Nto mmeloni mwaya vatsitsu Muluku ahiruma munku, khukhura mitathari tja murapela, murapel'owo khumma. ⁸ Numala, ntjuwa nikhumalene, Muluku ahopiha epheyo yovihexa; vano ntjuwa nahukelela wopela ventji vamuru wa Yona, Yon'owo ahotjeya, anatthuna okhwa, khwira: Halali kikhwe okhala nkumi wokiphwela. ⁹ Vano Muluku ahun'himerya Yona wira: Wunlela murapel'owo nunanariya exariya? Yona ahumwakhula wira: Ayo exariya kophweleya mpakha ophiyerya okhwa. ¹⁰ Vano APWIYA yahun'himerya wira: Nyuwo munnimorela ekharari murapel'owo, wahalalinyu, nnakhala wahamelihalinyu, owo omelale ohiyu omotja khumma ohiyu nkina; ¹¹ Vano miyo nkakhalale omorela ekharari nttetthe mulupale w'oNinive, wonwo akhalalyaya atthu ikonto miloko muloko ni minli ohintjuwela tuvi mono wolopwana wala mono wothiyana, wonwo okhalalyayawo inama tjohalikeleya?