¹ Tjitjammo APWIYA yahukoniherya: Kahona ettanka yotjareya mihokhorokho tjottokottha. ² APWIYA yahukikoha yiraka: Nniweha exeni, Amosi? Miyo kahuwakhula wira: Kiniweha ettanka ya mihokhorokho tjottokottha. Vano APWIYA yahukihimerya wira: Tjottheka tj'atthu a w'Israyeli tjottokottha; miyo kinamwahukhumu nkinalevelela-tho. ³ Nihuku nenno, matjipo a mpani mwa Muluku anurukunuwa ekhale ikuttho mirutthu tj'atthu tjinamwatta nipuri ti nipuro, ni anuttikheliya Mapuro otene. onukhala omaleleya! ⁴ Mwinwe tjana, nyuwo nnanyakela etthu ohawa, mwimphavela wamaliha nlaponi ahinoneliya vatthu, ⁵ Nyuwo nnihimya wira: ninvira lini nira nna na mweri woneya, wira niwerye otumiha tjolya tjihu? enivira lini esabadu ela , wira nitthukule ilotja tjihu ninrwaa ovukula miyeryo, n'upanka ibalantsa tjowin'yerya, wira niwakhe ntjurukhu ale anwa othuma, ⁶ Ninrwaa wathuma atthu othowiya ni ntjurukhu, ninrwaa watumiha alipa ohawa mwaha wa ixapattho, nintthuna otumiha hata etthupari? ⁷ APWIYA alaphela ovuwa w'atthu a Yakobe: Miyo nkinliyala-tho miteko tjaya tjotakhala. ⁸ Elapo enutetereya, atthu otene anamunla ekuttho? Elapo yotene enathukumela enutsareya ntoko muro, ewelele ntko muro wa w'Ejitu. ⁹ Apwiya MULUKU anihimya wira: Anuphiya mahuku awo, anrwaaka okeliha ntjuwa othana eriyari, n'ukhunela elapo ni ewiriphi othana eriyari wonwo. ¹⁰ Mahuku awo kinurukusa ifesta tjinyu tjikhale wokhwani, kinurukusa itjipo tjinyu tjotteliya nrima tjikhale ikuttho; kinamukhanyererihani owara mattapwatta numettha mputu; nnalikana ni mama onimunlela mwanewe okhwale, nihuku nno ninukhala nihuku nohawa mpakha omala. ¹¹ Apwiya MULUKU anihimyatho wira: Anuphiya mahuku anrwaaka omorihela etala elapo; atthu anuvoliya nto khahiyo etala ya yolya, nnakhala ntthona na matji , anuvoliya etala yowinwa mulumo APWIYA. ¹² Awo anrwaa wettetta ilapo tjotene okhuma ephareya yulupale, mpakha ephareya ekina; okhuma onikela epheyo mpakha onikhuma ntjuwa ephavelaka mulumo APWIYA, nto ehiphwanye. ¹³ Mahuku awo aximwali orera n'aximiravo okhomala anamotta mwaha wa ntthona. ¹⁴ Ale anlapha yaromolaka amuluku oSamariya; wala amuluku oDani; wala amuluku oBerixeba; otene aya anumora, ehivenye-tho.