¹ Apwiya MULUKU aka yahukoniherya etthu ela: Yahikumiherya nttitthi wa natjope, okathi wahattiw'aya malaxi a mwene; khupasera omela malaxi onanano. ² Natjope owo ahikhura malaxi otene ni nnyepu wotene wa nlaponi, miyo kahahimerya Apwiya MULUKU, mwalevelele, atthu'inyu xontte; awo anrwaa owerya tjayi okhala atthu'inyu? Awo ari vakhani ni ohilipa. ³ Vano APWIYA yahuttharuwa khwira: Tjitthu tjonalinnyu khatsinrwaa okhumelela-tho, anihimya t'APWIYA ⁴ Apwiya MULUKU aka yahikoniherya etthu ela: Kahaweha Apwiya MULUKU yawo okathi wapattihaya moro; wira yahukhumu atthu a nloko naya, moro owo wanipaha ephareya tulupale eri vathi v'olumwenku, onapasera opaha elapo yotene. ⁵ Vano miyo, kahahimerya Apwiya MULUKU: xontte apwiya Muluku aka, nkhurunuwe nrima; atthu'inyu anrwaa owerya tjayi okhala akumi? Awo ari vakhani ni ohilipa. ⁶ Ni APWIYA yahuttharuwa khwra: Tjitthu tjonalinnyu khatjinrwaa okhumelela, anihimya t'APWIYA owerya tjotene. ⁷ APWIYA Muluku aka yahikoniherya etthu ela: APWIYA yahemela vakhuviru ni exiri yamariya ekusale epurumu mmatatani, APWIYA yahukikoha wira: Nyuwo Amosi, munwehani? Miyo kahuwakhula wira: Kiniweha epurumu. ⁸ Apwiya yahukihimerya wira : Tjitjammo kinrwaa owereryanyiha atthu aka a Israyeli; kinamwahukhumu nkinrwaa-tho walevelela. ⁹ Mapuro ottukhuwa a Israyeli anupwexakasiya, mapuro awo okokhoreliya anrwaa okwanyulatjiya; kinamwavenyerya atthu a etthoko ya Yorobowamu kikusalene ekatana mmatatani. ¹⁰ Nave Amasiya, nlipa a nkuttho obetheli, ahiruma ohimeriya Yerobowamu, mwene a wIsrayeli wiraa. Amosi onupuwela worukunuwelani eriyari y'atthu a Israyeli; mulumo awe anrwaa opwetexa elapo'ihu tthiri Amosi owo anihimya wira. ¹¹ Nnihimya tjayi Amosi: Yerobowamu onamwinva n'ikatana, vano atthu otene a Israyeli anurwaniya okhalihiy ipottha ottayi n'ilapo aya. ¹² Vano Amasiya ahun'himerya Amosi wira : Nyuwo nlipa owona nvenye-va ntthyawele elapo y'oYuda, mwaphwanye wonwo yolya anyu, mwakhale profeta a wonwo; ¹³ Nto vava oBetheli, n'hilaleye-tho vava ti warya nipuro nokokhorela na mwene, enupa enkokhoreliyamo atthu a Israyeli. ¹⁴ Amosi ahumwakhula amasiya iraka. Miyo nkihiyo profeta onliviya nnakhala mwinttutjihi aya miyo kari makamputsi a inama, kittottelaka mihokhorokho tjolyiha. ¹⁵ Okathi miyo kalyihaka inama tjitjo, APWIYA yahukikusa APWIYA yawo yahukiruma yiraka: Nrwee, mwalalerye mulumo aka atthu a w'Israyeli. ¹⁶ Vano, mwinwe tjinihimyaya APWIYA. Nyuwo munnihimya wira: N'hilaleye tjotakhala tj'atthu a Israyeli, n'halo+pole atthu a nloko a w'Israyeli. ¹⁷ Tivo, APWIYA anihimya wira: Mwarinyu onokhala namararuwa mwinttettheni mumu, asan'innyu axilopwana ni asan'inyu axithiyana anamwinviya ni xowa, elapo'inyu enakawiya evahiyeke atthu akina; atthu otene a w'Israyeli anurwaaniya yakhalihiyeke ipottha omalaponi.